Level-2 drug pusher nasikop

CEBU, Philippines - Usa ka level-2 drug pusher ug ang pag-umangkon niini nadakpan sa kapolisan didto sa F. Ralota street, sa barangay Poblacion, dakbayan sa Danao kagahapon sa alas 8:00 sa buntag.

Ang nagkagulkol na karon sa prisohan sa Danao mao si Johnder Beduya alyas “John” , 31, minyo, ug Nelson Laguna, 19, ulitawo nga pulos taga Danao.

Ang mga dinakpan nasakmitan og   12 ka paketeng shabu nga mibalor og P10 mil, ug .kalibre 357 nga revolver nga may upat ka bala.

Si Supt. Teofilo Siclot pangulo sa Provicial Anti-Illegal Drugs Special Operation Task Group (PAIDSOTG) ug Deputy Provincial director for Operation (DPDO) nga nahinabi sa mga tigbalita nagkanayon nga nasikop nila ang mga suspetsado pinaagi sa Search Warrant (SW) nga giluwat ni Judge Marilyn Lagura Yap sa Regional Trial Court Branch 28 sa dakbayan sa Mandaue niadtong Agosto 8, 2011.

Matud ni Siclot nga nakadawat sila og impormasyon sa kalihokan ni Beduya kalabot sa pagpamaligya niini og shabu hinungdan nga ila kining gipapanid-an hangtud nga ilang gi-buy bust dungan sa pagsikop niini.

Si Beduya ug ang pag-umangkon niining si Laguna paingon untang mangihaw og baboy sa barangay Danasan, sa maong dakbayan atol sa pista sa maong dapit.

Subay sa ilang imbestigasyon, si Siclot miingon nga dugay nang diha sa ilang watch list si Beduya ug mitug-an   kini nga lima na siya ka tuig sa maong negosyo tungod kay adunay tighatod og shabu sa ilang balay apan wala niini ibutyag ang ngalan.

Gani tungod kay maayo og kita ang pamatigayon og shabu, gibiyaan niini ang naandan niyang panginabuhi nga panagat ug nalingaw na siya sa pagpamaligya og shabu.           

Karong buntag ipasaka na sa kapolisan ang kaso nga paglapas sa Section 5 ug 11 sa Republic Act 9165 ug illegal possession of firearms and ammunition   batok kang Beduya samtang Section 11 ang ipasakang kaso batok sa iyang pag-umangkon. (WC) (BANAT NEWS)