CEBU, Philippines - Si General Carmelo Valmoria ang Deputy Regional Director for Operation (DRDO) sa National Capital Regional Police Office (NCRPO) andam modawat nga mamahimong pangulo sa kapulisan dinhi sa rehiyon siyete.
Si Valmoria mianhi dinhi sa Sugbu kagahapong adlawa diha sa Police Regional Office (PRO)-7 nagkanayon nga kung siya ibutang dinhi andam siyang subling moserbisyo sa kabisay-an. Si Valmoria kanhi direktor sa kapulisan sa probinsya sa Sugbu sa wala pa siya mabalhin ngadto sa NCRPO ug didto usab niya nakuha ang iyang ranggo pagka- heneral.
Si PRO-7 Chief Supt. Ager Ontog sa iyang bahin miingon nga dako ang kahigayonan nga si Valmoria maoy mohulip kaniya sa pwesto sanglit usa man kini ka Sugboanon.
Gani nagkanayon siya nga daghang mga dagkong opisyal sa kapulisan dinhi sa rehiyon siyete nga mga Sugboanon nga sama nilang General Vicente ‘Vic’ Loot kinsa atua karun nadestino sa PRO-8 isip Deputy Regional Director for Administration (DRDA) Sr. Supt. Samuel Yordan ug uban pa nga naa diha sa PRO-7.
Apan matud ni Ontog nga siya mismo wala pa usab siya makadawat og kamanduan gikan sa Campo Crame nga pulihan na siya diha sa PRO-7.
Apan subay sa gihimong pakisusi sa Banat News daghan ang nag-ingon nga kun madayon nga si Valmoria maoy mamahimong pangulo sa PRO-7 daghang magkintong mga polis sanglit nabantog nga ‘straight’ ug suhito sa operations ug intelligence si Valmoria. - (BANAT NEWS)