77Km nga sub-transmission line napalit sa CEBECO

CEBU, Philippines - Gipaabot nga makaserbisyo na ang Cebu Electric Cooperative (Cebeco) 1, Cebeco 2 ug Cebeco 3 sa mas dagkong mga kustomer sama sa mga dagkong kompanya ug dili na mag-agi pa sa Transco. Kini gumikan sa pagpalit sa maong mga electric cooperatives sa 69 kilovolts sub-transmission lines sa Transco nga maoy gamitong iapod-apod sa ilang mga konsumidor.

Kagahapon gisugdan na ang linemen’s training sa 30 ka mga sakop sa tulo ka kooperatiba sa Cebeco sa tuyo nga matudloan sila sa 69KVA nga transmission lines nga mas taas sa naandan nilang 13.8KV limit. “Dako gyud mi og mapaabot after the seminar/training (sa mga linemen) because this is the first time that mag-operate mi og 69KVA,” matud pang Gannymede Tiu, ang assistant general manager sa Cebeco II.

Si Tiu miingon nga dakong bentaha kini alang sa mga kooperatiba sama sa Cebeco tungod kay aduna na silay kontrol sa sub-transmission assets ug dali silang makaaksyon kun adunay mga power interruptions.

Dugang bentahe niini matud pa ni Peter Señeres, ang general manager sa Cebeco 2 nga mahimo na silang makasuplay og kuryente sa mga dagkong kompanya nga magkinahanglan og 1 megawatt requirement.

Kaniadto adto direkta sa Transco nga karon gi-operate ug gimentinar sa National Grid Corporation of the Philippines (NGCP) mokuha ang maong mga dagkong kompanya apan karong aduna na silay 69KV sub-transmission mahimo na silang moserbisyo kanila ug dugang kita kini sa kooperatiba.

Giangkon hinuon ni Señeres nga adunay pagsaka sa umaabot nga presyo sa matag kilowatt hour sa ilang mga konsumidor tungod sa gastos sa pagkapalit sa maong linya gikan NGCP. Apan dili pa kini maimplimentar dayon karong mga panahona hangtud nga dili maaprubahan sa Energy Regulatory Board (ERC).

Ang Cebeco mipalit sa 77 kilometrong sub-transmission line sa Transco sa kantidad nga P42 milyones nga bayran sulod sa 20 ka tuig matud pang Señeres. Kini gikan sa Canamucan, Compostela padulong na sa lungsod sa Medillen.  - (BANAT NEWS)