Kagawad gipatay

CEBU, Philippines - Patay ang usa ka barangay konsehal nga may samad pinusilan sa ulo ug uban pang bahin sa iyang kalawasan nga gilabay sa kasagbotan sa barangay Ugis, dakbayan sa Danao alas-2 pasado na ang takna sa miaging Domingo sa hapon.

Si SPO1 Ildefonzo Prosia sa kapolisan sa maong dakbayan nga nahinabi sa Banat News miila sa biktima nga mao si Ugis barangay kagawad Renato Capol Ouano, 37,nagpuyo sa maong dapit.

Matud pa ni Prosia nga sa imbestigasyon nila ni Chief Inspector Alvin Villadar Balio, officer-in-charge sa Danao Police Station nga sayo pa sa buntag sa miaging adlaw Domingo mibiya ang biktima.

Sumala pa nga kini nananghid nga moadto sa ilang umahan sa ibabaw sa bungtod sa samang barangay.

Apan dihang tigpaniudto na wala pa kini mabalik aron makakaon hinungdan nga ilaha kining giapas sa umahan apan wala nila kini makit-i didto.

Tungod sa kabalaka dali silang mipahibalo sa barangay ug ang barangay na maoy mipahibalo sa kapolisan samtang gilusad nila ang pagpangita sa biktima diha sa palibot.

Si Ugis barangay kapitan Flordeliza Batucan ug mga kauban nga barangay opisyal maoy nagtinabangay sa pagpangita hangtod nga ilang napalgan ang biktima sa labong nga kasagbotan nga nagbuy-od nga patay na.

Dihang ilang gisusi ang kalawasan sa biktima nakabaton kini og samad pinusilan sa ulo, tiyan ug uban pang bahin sa kalawasan.

Ang patay’ng lawas sa biktima kasamtangan karong gihaya sa ilang panimalay sa maong dapit ug gikatakdang ilang ipaubos sa awtopsiya pagsuta sa hinungdan sa kamatayon niini.

Padayon pa ang kapolisan sa ilang imbestigasyon pagtino kun si kinsa ang responsable sa krimen.   - (BANAT NEWS)