Pamilya nadisgrasya
CEBU, Philippines - Patay ang usa ka 2-anyos nga batang lalaki samtang naangol ang iyang mga ginikanan human madasmagi og multicab ang ilang gisakyang motorsiklo sa barangay Babag II dakbayan sa Lapulapu sa milabay’ng hapon.
Ang namatay mao si Walter Jared Binolirao, 2, residente sa barangay Ibabao lungsod sa Cordova, samtang ang nagmaneho sa motorsiklo mao ang amahan niining si Wendell, 35, ug ang inahan niini nga si Juliet.
Ang drayber sa multicab mao si Cris Padriquilaga, 18,residente sa sitio Datag, Maribago dakbayan sa Lapulapu.
Base sa pasiunang imbestigasyon ni PO1 Romelio Adolfo sa traffic division sa Lapulapu nasuta nga gikan ang mga biktima sa Poblacion dakbayan sa Lapulapu padung na pauli.
Samtang si Padriquilaga gikan sa Cordova padung sa Poblacion dakbayan sa Lapulapu apan pag-abot sa nahitaboan sumala pa sa mga polis kalit mi-overtake ang multicab sa duha ka nag-unang sakyanan. Ug didto kini mikawat sa agianan sa mga biktima hinungdan sa panagbangga.
Si Walter gidala sa Lapulapu City Hospital apan gideklarar kini nga patay na tungod sa mga pangos ug bali sa kalawasan samtang ang ginikanan niini gidala sa Mactan Doctors Hospital ug luwas na sa peligro.
Si Padriquilaga nasuta nga hubog nga nagmaneho human mapositibo sa liquor test. - (BANAT NEWS)
- Latest
- Trending
