2 patay sa baha

CEBU, Philippines - Duha ang nakalas sa nahitabong pagbaha niadtong Domingo sa dakbayan sa Sugbu ug sa dakbayan sa Naga human mapalgi ang mga biktima niadtong Domingo sa buntag ug kagahapong adlawa.

Gidagsa sa Riverside sa barangay Canduman, dakbayan sa Mandaue ang patay’ng lawas sa usa ka lalaki nga gituohang gianod sa kusog nga bul-og sa tubig Butuanon River gikan sa bukid sa barangay San Jose, dakbayan sa Sugbo sa miaging Domingo sa hapon.

Si PO1 Ryan Diamado sa kapolisan sa Presinto 6 sa Canduman Police Station sa Mandaue City Police Office (MCPO) miingon nga alas-9 pasado sa Lunes sa buntag napalgan ang patay’ng lawas ni Edward Clarin nga nasagol sa mga gapnod nga gidagsa sa maong dapit,

Matud pa ni Diamada nga si Randel Clarin, 20, nga igsoon sa namatay maoy miila sa maong patay’ng lawas kinsa kuyog sa pagsuhid sa Butuanon River sa pagpangita sa igsuon niining nawala.

Sa nasayran nga kalit kaayo ang pagbunok sa kusog nga ulan sa miaging Domingo sa buntag nga nakamugna og kusog kaayong bul-og sa baha sa nahisgutang sapa.

Gikataho nga nanguha og mga anod nga kahoy ang biktima ug nakita pa kini nga naglangoy sa maong sapa apan ang pag-abot sa bul-og sa baha kalit lang ug ang biktima wala na igkita.   Si Diamada miingon nga nasangit ang daghang kahoy nga gianod sa maong sapa ug nasangit kini sa maong dapit uban usab sa patay’ng lawas sa biktima. 

Samtang pabiling wala pa mailhi ang gibana-banang 70-anyos pataas nga lola kinsa napalgang patay nga naglutaw sa kadagatan sa barangay Tinaan siyudad sa Naga niadtong Domingo sa alas 9:50 sa buntag.

Ang patay’ng lawas nagsul-ob og sinina nga kolor yellow ug naka- skirt nga kolor violet ug gibanabanang 5’2 ang gitas-on.

Matud ni PO1 Ronjie Nadorra desk officer sa Naga City Polie dihang nahinabi sa Banat News usa ka mananagat ang nakadiskubre sa patay’ng lawas nga naglutaw sa dagat.

Gidudahan sa kapulisan nga nalumos ang maong lola ug gituohang posibleng gikan kini sa bukid ug mitabok sa sapa apan gianod paubos. Giingong kusog kayo ang uwan niadtong Sabado ug Domingo sa bukid. Ang kapulisan nanawagan sa mga kabanay nga nawad-an ug kauban sa pamilya nga nagpangidarun ug 70 anyos pataas pagsusi niini sa punerarya sa Naga.   (EIM) - (BANAT NEWS)