2 nangawat sa mga senina sa dancer napriso

CEBU, Philippines - Nabalhug na sa prisohan ang duha ka kawatan nga gipasinginlang maoy mikiriw sa mga senina, kuwarta, cell phone ug uban pang mga butang sa mga dancer sa Pasigarbo sa Sugbo Festival sa miaging adlaw.

Sila mao si Bryan Montecalvo, 18, ug Richard dela Peña, 23, nga taga sitio Sto. Niño sa barangay Labogon.

Ang pagkasikop sa maong mga suspetsado nahimo dihang ang 24 ka mga mananayaw sa kalihokan sa Pasigarbo   niadtong Sabado didto moestar sa eskuylahan sa Labogon National High School sa barangay Labogon, dakbayan sa Mandaue.

Si PO2 Ranjie Lopez sa kapolisan sa Presinto 3 sa Basak Police Station sa Mandaue City Police Office (MCPO) nga nahinabi sa Banat News miingon nga ang mga biktima nga pulos sakop sa contingent   sa Pasigarbo Festival midangop sa ilang buhatan human mawagtang ang ilang mga sapot, cellphone, salapi ug uban pang mga butang.

Matud pa ni PO2 Lopez sirado ang maong lawak nga giukopar sa maong mga dancer tungod kay silang tanan didto man sa Cebu International Convention Center sa dakbayan sa Mandaue agi’g entrante sa street dancing   sa Pasigarbo sa Sugbo Festival.

Dugang pa niya nga nakurat nalang ang mga biktima kay aberto na ang pultahan sa   lawak nga ilang giukopahan sa ilang pag-abot sa alas 12:00 pasado ang takna sa gabii niadtong Sabado.

Matud pa ni PO2 Lopez nga nagkatag na ang mga butang sa mga biktima   sa sawog ug gihurot og kawat ang ilang salapi, mga sapot   ug mga cell phone nga gibilin didto.

Dugang pa ni PO2 Lopez nga didto moagi sa luyong pultahan ang mga kawatan pinaagi sa pagguba sa kandado niini hinungdan nga nakasulod sila sa lawak sa maong tulunghaan.

Giandam na ang tukmang kaso nga ipasaka batok sa maong mga suspetsado.  - BANAT NEWS