Palcuto gihinginlan na sa Kapitolyo

CEBU, Philippines - Gipadad-an na og final demand letter sa Kapitolyo si retired Col. Rico Palcuto niadtong Agosto 8, 2011 aron siya pabiyaon gikan sa gipuy-an niyang lote sa barangay Banilad ning dakbayan nga gipanag-iya sa lalawigan sa Sugbo.

Si Provincial Treasurer Roy Salubre nga maoy mipadala sa maong suwat mipasabot kang Palcuto nga ang Lot No.3-A-1-B nga gitarokan sa iyang balay nahilakip sa luna nga tukoran sa Ciudad Project, ang usa ka proyekto nga tambayayongan sa pagpadagan sa Kapitolyo ug sa pribadong kompaniya. 

Matud pa ni Salubre nga gikinahanglang bakantihan na ni Palcuto ang maong lugar kay malagmit kasugdan na ang pagtukod sa Ciudad Porject karong tuiga ug di gusto ang kagamhanan sa lalawigan nga mabalda ang maong proyekto gumikan sa mga balay nga wala pa malarot.

Kahinumdoman nga kaniadto pang Nobiyembre 15, 2006 gipadad-an og Letter of Demand to Vacate si Palcuto apan wala gihapon kini mobiya sa iyang gipuy-an hangtod karon.

Nasayran nga si Palcuto gihatagan na lamang hangtod sa Septiyembre 15, 2011 nga lugway sa pagbiya sa nahisgutang luna.

Kun magpadayon siya nga dili motuman sa gimando sa Kapitolyo sa pagpapahawa kaniya gikan sa maong lote mapugos ang kagamhanan sa lalawigan sa paggamit sa kaugalingong kahimanan niini sa paglarot sa iyang balay.  - BANAT NEWS

Show comments