Oliva ginganlan ni Gwen og ignorante

CEBU, Philippines - Gumikan sa kapungot ni Gobernador Gwendolyn Garcia batok sa tresurero sa dakbayan sa Mandaue, pintok niyang ginganlan si Regal Oliva nga ignorante sa balaod.

Kini tungod sa pagpaningil ni Oliva og buhis sa Kapitolyo nga migamit sa Cebu International Convention Center alang sa pagladlad sa mga produkto sa nagkadaiyang negosyante atol sa gipahigayong One Cebu Expo.

Matud pa sa gobernadora nga nagpatuyang lang si Oliva sa iyang pagtumbok nga ang Kapitolyo nga maoy organizer sa maong kalihukan kinahanglang mokuha og mayor’s permit sa dakbayan Mandaue .

Samtang si Capitol Consultant on Information, Revenue Generation and Compliance Rory Jon Sepulveda subling mipasabut nga dili mamahimong kolektahan og buhis ang lalawigan sa Sugbo nga maoy organizer sa One Cebu Expo kay usa kini ka kalapasan sa balaod sa Local Government Code (LGC) of 1991.

Kini tungod kay sigun sa probisyon sa LGC nga walay gitugotan nga lokal nga kagamhanan nga mangolekta og buhis sa iyang isig ka local government unit.

Gitumbok ni Sepulveda nga basin og wala makabasa o kaha wala makasabot sa balaod ang nahisgutang tresurero sa siyudad sa Mandaue.

Si Gobernador Garcia mitumbok usab nga kun ingon man niini ang paagi sa treasurer sa Mandaue ang sagupon sa probinsiya sa Sugbo hayan mapasirad-an sa kagamhanan sa lalawigan sa Sugbo ang City hall sa Mandaue kay wala man usab kini makatunol og buhis sa probinsiya.

Kahinumdoman nga ang katuyoan sa One Cebu Expo mao nga pagpasundayag sa   mga produkto sa Sugbo aron ikapaila kini ngadto sa mga pumapalit ug mapalambo ang mga produkto gikan sa kalungsoran.  - BANAT NEWS