Mga polis naproblema sa mga Indians

CEBU, Philippines - Usa sa problema sa kapolisan karon ang kabahin sa mga insidente sa tulis kinsa ubang mga biktima mga Indian national kinsa mga nagpautang og kwarta ug mga butang.

Kasagaran sa mga mabiktimang Indian magpanuko og report ngadto sa kapolisan sa nahitabo gawas nalang kung aduna nay mapatay kanila.

Kahinumduman nga bag-o lang usa ka Indian national nga si Raja Singh ang gipusil patay sa mga mitulis kaniya diha sa barangay Mohon, dakbayan sa Talisay.

Si Singh naningil sa mga nakautang diha sa Mohon dihang gitulis ug gipusil. Nadakpan hinuon ang mga suspek nga sila si Rutchel Alcover ug Jeriel Sembrano duha ka oras human sa hitabo.

Apan base sa nadawat nga report sa kapolisan nga sayo pa nianang adlawa sa wala pa mapatay si Singh laing Indian national ang unang nabiktima sa duha apan ang biktima wala mo-report ngadto sa mga polis.

Sa mga insidente sa tulis nga ang biktima mga Indian dili lang sa dakbayan sa Talisay nahitabo apan ang mga biktima (Indians) dili gyud mosumbong sa kapolisan.

Ang officer-in-charge sa Talisay City Police Station nga si Chief Inspector Eddie Recamara sa pakighinabi niini sa Banat News nagkanayon nga wala silay na-recover nga passport gikan sa patay’ng lawas ni Singh aron unta masubay nila ang gigikanan niini.

Hinuon matud ni Recamara nga dunay mianha sa ilang buhatan nga mga Indian nga miila kang Singh nga ila kining higala ug mibutyag nga usa ka tuig pa lang sa nasud ang biktima.

Dihang ilang gipangitaan og passport ni Singh walay napakitang passport pagtino sa pagkatawo ni Singh ang iyang mga higala.

Base sa patakaran alang sa mga langyaw nga moanhi sa nasud gikinahanglang magdala-dala gyud sila sa ilang pasaporte bisan asa pa sila moadto dinhi nasud aron kun adunay mositar makapakita sila dayon niini.  - BANAT NEWS