Carcar midaog sa Festival

CEBU, Philippines - Malampuson nga gipahigayon ang ika- upat ka tuig nga Pasigarbo sa Sugbo Festival of Festivals Grand Showdown 2011 didto sa Cebu International Convention center (CICC) sa dakbayan sa Mandaue.

Ang maong showdown gisaksihan mismo nila ni Gobernador Gwen Garcia, Bise Gobernador Agnes Magpale, mga Provincial Board Member, mga Senador nga sila si Jinggoy Estrada ug Bongbong Marcos, kanhi first lady ug karon congresswoman Imelda Marcos sa Ilocos, Ilocos Governor Imee Marcos, mga opisyales sa Probinsya sa Ilocos Norte, South Cotabato Gov. Arthur Pingoy Jr. ug kaubanang opisyal sa South Cotabato ug ingon man usab ang kaliboan nga mga bisita gikan sa gawas sa nasud ug gikan pa sa mga nagkalain-laing mga kalungsoran sa lalawigan ug dakbayan sa Sugbo.

Mikabat og 40 ka mga contingent nga naggikan sa mga kalungsoran ug dakbayan sa Sugbo ang nagtigi sa maong showdown.

Si Senador Estrada nakadayeg pag-ayo sa mga pasundayag sa nahisgutang festival nga iyang gihulagway nga maoy labing maayong festival nga iyang nakita sa tibuok nasud sa Pilipinas.

Tungod sa nagkadaghang nga maayong mga contingent gikan sa kalungsoran, ang mga hurado sa hahisgutang indigay mipahibawo nga si Gobernador Garcia nakadisisyon nga himuong top 12 ang mga mananaog inay napulo lamang.

Busa ang top 12 ritual and showdown winner, nasakmit sa Kabkaban Festival sa dakbayan sa Carcar , ang 2nd runner up mao ang Isda Festival sa lungsod sa Madredijos, ika-tulo ang Latorta Festival sa Argao, ika-upat ang Kagasangan Festival sa Moalboal, ika-lima ang Sarok Festival sa Consolacion, ika -unom ang Bonga Festival sa Sibunga, ika-pito ang Palawod Festival sa Bantayan, ika-walo ang Dagitab Festival sa dakbayan sa Naga, ika-siyam ang Hinulawan Festival sa dakbayan sa Toledo, ika-napulo ang Sugat Kabanhawan sa Minglanilla, ika-onse ang Halad Inasal Festival sa dakbayan sa Talisay, ug ang ika -dose ang Siloy Festival sa lungsod sa Alcoy. Si Mayor Nicepuro Apura sa dakbayan sa Carcar mitug-an nga dako kaayo ang ilang kalipay isip mananaog ug midugang nga mapasigarbuhon kaayo sila tungod sa mga tabang nga nahatag sa probinsya sa Sugbo sa pagpanguna ni Gobernador Garcia. Samtang sa bahin usab ni Gobernador Garcia kini nagkanayon nga mapasigarbohon usab kaayo siya kay iyang nakita kun unsa na ka malambuon ang maong programa ubos sa iyang administrasyon, nga gisalmotan sa mga kabataan.     

Ang formal nga awarding ug paghatag sa mga premyo himoon karong gabii didto sa CICC.  - BANAT NEWS