Kaso sa milugos sa empleyada isang-at

CEBU, Philippines - Andam nang ipasaka ang kasong pagpanglugos karong adlawa batok sa usa ka negosyante   nga miunay og lugos sa iyang trabahanteng minyo didto sa barangay Centro sa dakbayan sa Mandaue sa miaging gabii.

Ang pasakaan sa maong kaso mao ang 41-anyos nga tag-iya og lending firm, nga taga barangay Jagobiao sa maong dakbayan kinsa nagtingakgol na karon sa prisohan.

Ang suspetsado kansang lending firm anaa sa barangay Centro sa dakbayan sa Mandaue anaa ibalhug karon sa detention cell sa Presinto 1 sa Centro Police Station sa Mandaue City Police Office (MCPO) hugtanong mihimakak sa pasangil batok kaniya.

Apan ang biktima kinsa supervisor sa lending firm sa suspetsado, walay lipud-lipod nga miyagyag ngadto sa kapolisan sa nahitabo kaniya sa dayon na niyang pauli sa ilang balay sa miaging gabii.

Sa iyang sumbong kang PO1 Diane Magbanua sa womens’ desk section sa Presinto 1 , ang biktima nagkanayon nga sa dayon niyang gawas sa pultahan sa ilang opisina sa alas 6:00 pasado ang takna sa kagabhion, kalit siyang gipugngan sa suspek ug gibunlot ug gipasandig sa bungbong diin didto giligid ang iyang nawong ug kalawasan sa mga halok niini.

Misulay unta siya sa pagkisikisi ug pagpangwakli sa paglingkawas sa piit kaayong paggakus sa iyang agalon apan nangatumba sila sa sawog ug nangaligid hangtod nga milampos kini sa paghubo sa iyang under wear dayong pagpakighilawas kaniya nga supak sa iyang kabubut-on.

Dugang pa sa biktima nga nakahigayon siya sa pagpatid sa atubangan sa suspetsado ug dihang misagunto kini sa kasakit dali siyang nakabangon ug nakahigayon sa paggawas sa ilang buhatan.

Gitug-an sa biktima ngadto sa iyang bana ang nahitabo kaniya nga maoy hinungdan nga gikuyogan usab siya sa pagtaho sa buhatan sa kapolisan sa iyang gidangatan.

Si PO1 Magbanua miingon nga ang kaso nga pagpanglugos ilang hingpit nga ipasaka batok sa maong suspetsado base usab sa mogawas nga resulta sa medical examination sa mga doktor ngadto sa biktima.  - BANAT NEWS