Gwen giduso sa mga Marcos pagkasenador

CEBU, Philippines - Kung mokandidato si Gob. Gwendolyn Garcia pagka-senador sa sunod piniliay dili kini maglisod pagpaila sa iyang kaugalingon ug nahimo ngadto sa mga Ilocano.

Kini human ang mismong banay’ng Marcos sa Ilocos Norte miduso kang Garcia nga modagan pagkasenador sa 2013 nga eleksiyon kauban ni Gob. Imee Marcos.

Ang pag-endorso giluwatan ni Kong. Rudy Fariñas sa Ilocos Norte sa ilang pagbisita sa Sugbo ug gidasonan kini nilang Senador Bongbong Marcos ug Imee kinsa kauban usab sa ilang inahan nga si Kong. Imelda Marcos.

Atol sa ilang pagbisita, matud pa ni Fariñas nga angayan nang ilusad ang kandidatura nilang Garcia ug Imee gumikan sa presensiya usab nilang Gob. Joey Salceda sa Albay ug Gob. Arthur Pingoy sa South Cotabato.

Hinuon matud pa ni Bongbong nga wala pa mohisgot si Garcia sa plano niini alang sa 2013 apan andam na sila sa pagsuporta kung mopapili kini sa nasudnong posisyon.

Si Imee usab nagkanayon nga ang nakanindot ni Garcia kay daghan kining mapilian nga posisyon sa 2013 ug lakip na ang pagka senador.

Sa miaging tuig, si Senador Ramon “Bong” Revilla miendosar usab kang Garcia sa pagka-senador ug mipasalig nga ang mga Revilla sa Cavite andam mopaluyo kaniya.  - BANAT NEWS