Usa missing sa baha

CEBU, Philippines - Usa ka lalaki ang gikatahong na-missing kagahapon ug gituohang naanod sa Butuan River tungod sa kalit nga pag-abot sa bul-og sa tubig baha gikan sa bukid diha sa Purok 5 barangay San Jose.

Samtang 10 ka pamilya usab ang naapektuhan sa kalit nga pagkusog agas sa baha pasado alas-2 kagahapon sa hapon sa samang dapit.

Ang padayong gipangita sa mga rescuers atol ning pagsulat sa balita mao si Edward Clarin, 27-anyos ug molupyo sa maong lugar.

Sa pakighinabi sa Banat News ni PO2 Rodel Abejuela, usa sa mga responding team, base sa ilang nakuha nga impormasyon gikan sa mga residente nakit-an nila kining gihapak sa bul-og sa baha samtang naglangoy sa maong sapa.

Matud pa ni Abejuela nga ang biktima uwahing nakit-ang nanguha og kahoy daplin sa nahigsutang sapa nga gianod samtang kusog nga nagbunok ang ulan kagahapon.

Dangtan ang pipila ka minutos nakit-an nila kining naglangoy sa maong sapa apan kalit nga midahunog ang sapa ug midagayday ang dakong bul-og sa baha ug mikusog ang sulog paubos.

Tungod niini gianod si Clarin ug wala na nila igkitang mibalik og lutaw hinungdan nga dali silang nanawag sa Talamban Police Station nga daling miresponde.

Lakip sa miresponde ang mga sakop sa Bureau of Fire Protection Special Reaction Unit (SRU), Cebu City Disaster Coordinating Council (CCDCC) ug Apas Rescue Team.

Sa pakighinabi sa Banat News ni Alvin Santillana, executive director sa CCDCC, kini mibutyag nga gawas kang Clarin adunay napulo ka pamilya ang ilang gipabakwit gikan sa ilang pinuy-anan.

Kini tungod sa kapeligroso sa ilang nahimutangan gikan sa nagkataas nga tubig sa maong sapa.

Matud pa ni Santillana nga ang 10 ka pamilya ila una nga gihatagan og tent nga mao una ang ilang puy-an.

Samtang ang Philippine Atmospheric Geophysical and Astronomical Services Administration (PAG-ASA) weather forecaster nga si Ponce Garcia nga nahinabi sa Banat News nagkanayon nga walay bagyong misulod sa Pilipinas karong mga panahona.

Ang nasinating kusog nga bunok sa uwan mugna lang sa localized thunderstorm tungod sa inter-tropical convergence zone (ITCZ) ug tungod karong mga bahina sa tuig panahon man sa ting-uwan.  - BANAT NEWS