CEBU, Philippines - Ilusad sa National Grid Corporation of the Philippines (NGCP) ang duha ka adlaw nga nationwide lineman’s training niini diha sa lungsod sa Compostela karong Agosto 15 ug 16 alang niadtong mga kooperatiba nga nag-suplay og kuryente sa mga konsumidor dinhi sa Sugbu.
Kini maoy labing unang pagbansay-bansay sa daghan pang trainings nga libreng ihatag sa NGCP diha sa NGCP Lineman's Academy sa barangay Canamucan sa maong lungsod.
Ang unang mga benepisaryo sa maong pagbansay-bansay mao ang Cebu Electric Cooperatives CEBECO I, CEBECO II, ug CEBECO III.
Ang paglusad sa maong training gitugutan ni NGCP President ug CEO Henry T. Sy, Jr. tungod usab sa hangyo sa ilang mga electric cooperatives.
Matud pa niini nga ang katuyoan niini mao nga mabansay ang mga linemen sa mga electric cooperatives aron mapalambo pa ang ilang kahibalo ug skills sa ilang mga trabaho sama sa maintenance sa mga sub-transmission lines.
“The possibility of NGCP doing restoration or emergency work together with the electric cooperatives will be greater because of this skills enhancement program with our partners. This will result to faster restoration time, shorter power interruptions and overall improvement in power reliability and security,” pasabot pa ni Sy.
Ang NGCP maoy nag-inusarang power transmission service provider ug system operator sa nasud.
Sila maoy nagpatukod sa mga dagkong towers nga gikutayan sa mga dagkong linya sa kuryente gikan sa mga power plants padulong sa mga electric cooperatives nga maoy nag-suplay sa mga kuryente sa publiko. Gawas sa mga power distributors sa Cebu lakip sa motambong sa training mao ang Samar Electric Cooperative, Northern Samar Electric Cooperative, Davao Oriental Electric Cooperative, Nueva Ecija Electric Cooperative II, Ilocos Sur Electric Cooperative, ug ang Public Utility Department sa Olongapo City.
Lakip sa itudlo mao ang hustong pagpahibalo sa mga customer sa power interruptions, notisya ug uban pa; itudlo usab ang hassle-free nga pagkolekta sa billings pinaagi sa online system nga UBSS (Unified Billing and Settlement System). (BANAT NEWS)