Pundohana'g tubig nahugno

CEBU, Philippines - Pundohanan og tubig sa usa ka subdivision sa barangay Bulacao, dakbyan sa Talisay nahugno kagahapon sayo sa buntag ug nabanlas ang tubig, lapok ug mga bato sa usa ka daycare center apan swerteng walay klase niadtong tungura.

Si Kagawad Banjo Abastilla mibutyag nga ang daycare center naa sa ubos nga bahin sa nahugnong settling pond sa Rustyville Subdivision nga gipanag-iya ni Rustico Pelayo.

Gibutyag ni Abastilla nga napulo ka tuig nang natukod ang maong pond ug nagsilbing catch basin o ang tubig sa uwan sa subdivision panahon sa ting-uwan.

Gituohan nga ang nahimutangang luna sa pond mihumok na tungod sa pagsige og bundak sa uwan ug posibleng wala na kini malimpiyohi ug nabug-atan hinungdan nga nahugno.

Ang tubig, lapok ug bato midahili paingon ngadto sa gymnasium sa barangay diin mahimutang ang daycare center ug basketball court, bugtong ang sandayon lang sa gym ang naguba sa paghagsa.

Hinuon si Pelayo matud pang Abastilla nagkanayon nga magtukod kini og laing pond nga samang desenyo sa nahugno apan ilaha kining gibabagan tungod kay buot nilang ipasusi una sa engineering office sa siyudad ang kaluwasan niini.

Gawas niini karong Lunes gikatakdang ipatawag sa barangay si Pelayo ug adunay himuong pakisusi ang mga opisyal sa barangay sa Environmental Compliance Certificate (ECC) sa subdivision sa Department of Environment and Natural Resources (DENR).

Gibutyag usab ni Abastillas nga nagkinahanglan unta nga ang barangay mopatukod og rip-rap aron malikayan ang nahisgutang hitabo apan wala sila’y igong pundo alang niini. Si Abastillas midugang nga mokabat ngadto sa P500 mil ang gastuhon sa ipatukod untang rip-rap. (BANAT NEWS)