100 ka panimalay pahimuon og CR

CEBU, Philippines - Ang mokabat sa 100 ka mga panimalay sa lungsod sa Dumanjug nga walay pansayan gimando ni Mayor Nelson Garcia nga pabuhaton og kasilyas.

Kini aron pagsiguro nga ang hugaw sa mga molupyo dili mosagol sa tinubdan sa tubig nga imnonon sa mga tawo. Hinuon matud pa sa mayor nga ang iyang buhatan maoy mohatag og libreng materyales alang sa pansayan ug ang mga molupyo na ang mopanday niini. Giklaro ni mayor Garcia nga ang iyang hatagan nga libre sa maong mga materyales mao kadtong tua magpuyo sa ibabaw nga bahin sa ilang lungsod.

Gipalanog sa mayor sa Dumanjug nga ang bugtong tinguha niya ning maong programa mao nga maampingan pag-ayo sa kahinlo ug kaluwas sa mga molupyo gikan sa nagkalainlaing matang sa sakit nga motakboy sa tawo gikan sa hugaw nga tubig ug uban pang pagkaon.

Dugang pa sa mayor nga paninguha-on gayud niya nga mahatagan og pansayan ang tanang panimalay sa Dumanjug ilabina kadtong mga panimalay nga nahimutang sa bukirang bahin sa maong lungsod. (BANAT NEWS)