Ulitawo gipusil sa iyang gibaligyaa'g cell

CEBU, Philippines - Samdan ang usa ka ulitawo human kini pusila sa iyang gihagdan sa ibaligya unta niyang cellphone didto sa sitio Saac 1, barangay Buaya, dakbayan sa Lapulapu sa miaging gabii.

Ang biktima mao si Jimmy Dignos, 23, ulitawo nga lumad nga taga Mercado sa barangay Basak, sa maong dakbayan, samtang ang suspetsado mao usab si Justine Tamara nga nagpuyo sa Saac 1, barangay Buaya sa maong dakbayan.

Si PO2 Carlos Barluado sa kapolisan sa Lapulapu miingon nga sa ilang imbestigasyon nga gihimo ilang nasayran nga gitanyag sa biktima ang iyang cellphone niini ngadto sa suspetsado.

Apan matud pa sa biktima   nga human sil-inga sa suspetsado ang iyang cell phone milanit kini sa gitangkil nga armas de fuego ug gimandaran ang biktima sa pagpadagan.

Matud pa ni PO2 Barluado nga sa pagdagan sa biktima gipusil dayon kini sa suspetsado busa nasabak ang tiyan sa nahauna.

Bisan samaron na padayong   midagan ang biktima hangtod nga nakapangayo kini og panabang sa tourist police .

Gihatod siya ngadto sa Lapulapu City Hospital apan gibalhin usab dayon kini ngadto sa Vicente Sotto Memorial Medical Center sa dakbayan sa Sugbo.

Si PO2 Barluado miingon nga ang suspetsado nga nakasibat human sa maong pagpamusil padayon pa karon nilang gipangita. (BANAT NEWS)