Construction worker giurom

CEBU, Philippines - Usa ka construction worker kinsa gituohang giurom, patay nang nadiskobrehan sa iyang mga kauban sa trabaho sa usa ka lawak sa Bankal Elementary School sa barangay Bankal, dakbayan sa Lapulapu sa miaging buntag.

Ang namatay mao si Ruel Las Perlas, 37, minyo nga lumad nga taga barangay Sangat, lungsod sa San Fernando, sa lalawigan sa Sugbo ug nagtrabaho sa usa ka konstruksyon sa Bangkal.

Si PO1 Sergio Lapuerta sa kapolisan sa maong dakbayan nga nahinabi sa Banat News miingon nga nagbuy-od lang sa sawog nga semento ang biktima nga wala nay kinabuhi.

Matud pa ni PO1 Lapuerta   nga human madawat nila ang taho gikan sa mga kauban sa biktima, ila dayon kining gisusi.

Matud pa ni PO1 Lapuerta nga sila si Retchelle Udtohan ug Samuel Las Perlas, pulos kauban   sa namatay, miingon nga sayo sa miaging gabii kini   mihigda sa lawak   nga nag-inusara.

Apan natingala sila nianang pagka-buntag kay wala man kini mobangon   ug dihang ilang gisusi, wala na kini magginhawa.

Girekomendar sa kapolisan ngadto sa kabanay sa namatay nga ipa-autopsy ang lawas patay niini aron masayran kun wala bay foul play ang iyang kamatayon. (BANAT NEWS)