Imelda Marcos natumba sa entablado

CEBU, Philippines - Natumba si kanhi Unang Ginang ug karon Kongresista Imelda Marcos sa entablado sa Kapitolyo sa Sugbo human sa kapin sa napulo ka minutos niyang pakigpulong kagahapon.

Si Marcos padulong untang modalit og kantang “Matud Nila” human sa iyang pakigpulong sa dihang naligas ang iyang tiil sa gitungtungan niini sa iyang pagdiskurso.

Gumikan sa wala na niya pagbalanse sa iyang lawas natumba kini hinungdan nga daw giugbok nga kandila ang tanang nanambong ug pipila pa ka gutlo nga natabang ug gibangon si Marcos.

Daling mitabang kaniya ang anak nga sila si Senador Bongbong Marcos, Gob. Imee Marcos, mga apo ug ubang kaubanan sa grupo nga gilangkuban sa mga lokal nga opisyal sa Ilocos Norte. Lakip sa miduol dayun sila si Gob. Gwendolyn Garcia ug ubang opisyal.

Human nakabangon si Imelda, sama sa usa ka maisugong Unang Ginang sa kanhi pangulo sa nasud kaniadto nga si anhing Ferdinand Marcos mipadayon gyud kini sa pagkanta nga daw sa wala la’y nahitabo kaniya.

Gidunganan si Imelda sa pagkanta og “Matud Nila” ni Deputy Speaker Pablo Garcia ug gisundan pa gyud og ikaduhang kantang Bol-anon, “Malipadyon Ang Takna” diin silang Imee ug Gwen ang miduyog na usab ug nahimong sama sa konsiyerto ang kalihukan dayon human niini.

Si Bongbong nga gipangumusta sa mga tigbalita sa kahimtang sa iyang inahan nagkanayon nga walay problema ug gani nakahimo pa kini sa pagkanta.

Si Imelda kinsa 82-anyos na nangomedya pa nga batan-on pa siya ug lig-on bisan sa nahitabo kaniya.

Gawas sa pamilyang Marcos ug Kong. Rudy Farinas, mokabat pa sa 80 ka mga lokal nga opisyal sa Ilocos Norte ang ania sa Sugbo aron pagtambong sa mga kalihukan isip igsuong probinsiya sa sa Sugbo.

Ang delegasyon gikan nanan-aw sa nabantog na kaayong dancing inmates sa Cebu Provincial Detention and Rehabilitation Center dayun sa Kapitolyo naniudto.

Ang delegasyon misaksi usab sa Pasigarbo sa Sugbo sa Cebu International Convention Center kagabii. (BANAT NEWS)