Shootout sa buy-bust 1 patay

CEBU, Philippines - Usa ang patay ug laing usa naangol atol sa buy-bust operation sa kapolisan dihang misukol ang mga suspek ug nakigpinusilay sa mga sakop sa Provincial Intelligence Branch (PIB) sa Cebu Police Provincial Office (CPPO) kagahapon sa alas 6:45 sa buntag didto sa barangay Balud sa Dalaguete.

Ang gipasanginlang tigpayuhot og ginadiling drugas ug gikonsiderar nga level-2 drug pushers sa kapulisan mao ang napatay nga si Joseph Gañolon, 27, ug naangol usab ang manghod niining si Jojo, 24.

Nadakpan usab sa maong operasyon ang ilang mga kaubang sila si Bryan Carali, 23, taga barangay Balud ug Beloriano Heredia, 23, taga Nalhub Dalaguete.

Ang mga sakop sa PIB pinangulohan ni SPO3 Reynaldo Solante nakig-alayon sa kapulisan sa lungsod pinangulohan ni SPO2 Clito Pia sa pagpahigayon og buy-bust operation batuk sa mga suspetsado.

Sumala pa nga nakabantay ang mga suspek dihang gilibutan na sa mga polis ang lugar nga niadtong tungura mopalit unta gamit ang poseur buyer og shabu kang Jojo kinsa maoy ilang target sikupon.

 Diha-diha mipaka ang buto sa armas hinungdan nga nahitabo ang pinusilay tali sa mga suspek ug mga polis. Si Joseph naigo sa iyang lawas samtang ang manghod niini naigo sa paa ug wala na makalihok sa mga polis.

Ang lain pang duha nila ka kauban mitahan nalang sa mga polis nga naglibot kanila. 

Daling gihatud sa Dalaguete District Hospital ang managsuong Gañolon apan si Joseph gideklarar nga patay na samtang ang manghod niini gibalhin sa tambalanan sa dakbayan sa Sugbu.

Nakuha gikan sa posisyon sa mga suspek ang upat ka lain-laing kalibre sa armas nga kalibre .45; kalibre .38 ug duha ka .357 ug usa ka granada .

Apil sa nasakmit gikan kanila ang gibanabanang 32 ka gagmay’ng sachet nga dunay sulod nga gituohang shabu ug laing tulo ka dagkung pakete nga duna gihapoy sulod nga shabu ug mga gamit paghingos niini.

Si Insp. Bonifacio Dela Cerna ang hepe sa Dalaguete Police Station nga nahinabi sa Banat News mikonsiderar sa grupo nga big time pushers sa lungsod ug taud-taod na nila kining gipanid-an.(EIM) (BANAT NEWS)