NCDG misuwat kang P.Noy bahin sa isyu sa Veceu

CEBU, Philippines - Ang grupo sa mga obispo ug kaparian mipadangat og suwat ngadto kang Presidente Benigno Simeon Aquino III nga nag-awhag nga protihian ang integridad sa labor unions ug katungod sa mga trabahante nunot niining nagpadayong kasungian sa mga kawani ug tagdumala sa Visayan Electric Company.

Sa milabay’ng mga adlaw ang National Clergy Discernment Group (NCDG) mipadalag suwat kabahin sa isyu sa Visayan Electric Company Employees Union (VECEU).

Ang maong suwat gilagdaan ni Bishop Gerardo Alminaza, nagkanayon kini nga naalarma sila sa desisyon sa Department of Labor (DOLE) ug sa National Labor Relations Commission (NLRC) tungod kay pabor kini ngadto sa tagdumala sa VECO.

Matud pa sa grupo nga miduol na sila sa presidential office aron mopahigayon og imbestigasyon nganong ang DOLE nagpakahilom lang kabahin sa report sa VECEU nga gipadangat ngadto sa DOLE niadtong Disyembre 3, 2010 kabahin sa giingong kalapasan sa tagdumala sa VECO sa provision sa Assumption of Jurisdiction (JA).

Apan wala tagda sa presidential office ang ilang hangyo.

Sa Assumption of Jurisdiction ang ruling ni labor Secretary Rosalinda Baldoz niadtong Marso 22, 2011 matud pa sa NCDG klaro nga ang payroll sa reinstatement nagpasabot nga ang tanang mga benepisyo sa gikasabutan diha sa CBA kinahanglang mahatag ngadto sa presidente sa VECEU nga si Casmero Mahilum.

Sa uwahing ruling niadtong Hunyo 30, 2011 ang NLRC 7th Division miluwat og desisyon nga nagkanayon nga legal ang pagtaktak sa presidente sa union ug walay gipahigayon nga “unfair labor practice” ang VECO.

Si Ethel Natera ang tigpamaba sa VECO sa pakighinabi sa Banat News nagkanayon nga naglibog sila kung unsa pamang benepisyo diha sa Collective Bargaining Agreement (CBA) ang gipangayo nila Mahilum nga nataktak naman sila sa serbisyo.

“Unsa paman nga benefits ang iyang gipangita nga nahatag naman sa iya iyang sweldo? Gitagaan naman siya sa iyang benefits, unsa paman nga benefits sa CBA nga na-dismiss naman siya?” pangutana pang Natera.

Si Natera nagkanayon nga kun buot niining moapelar sa ruling adto na kini sa legal nga proseso. Apan gibarugan ni Natera nga nasunod sa VECO ang obligasyon niini sa mga kawani. (BANAT NEWS)