Teacher gisapot mga butang sa tinun-an gipanglabay

CEBU, Philippines - Usa ka magtutudlo sa Calajo-an Elementary School sa lungsod sa Minglanilla kinsa giingong napungot kay wala manghinlo sa lawak klasehanan ang iyang mga tinun-an gipasanginlang misalibay sa mga butang sa iyang mga estudyante ngadto sa tubigang bahin sa palibot sa eskuylahan niadtong Huwebes sa buntag.

Sumala sa taho, nasayran nga ang magtutudlo sa Grade 4 sa nahisgutang eskuylahan mikulisiw sa kasuko paghuman sa flag ceremony dihang naabtan niyang nagkagubot ang iyang mga tinun-an sulod sa lawak klasehanan nga wala manglimpyo niini.

Gumikan sa kalagot sa maong magtutudlo giingong gipanglabay ang mga   libro, notebook ug uban pa, nga iya sa mga tinun-an ngadto sa gawas sa lawak hinungdan nga nangabasa kini sa tubig.

Gumikan  sa maong hitabo ang 13 ka mga tinun-an uban sa ilang mga inahan nagduyog sa pagpanghilak gumikan sa ilang kaguol sa nahitabo.

Si Regional Director Recaredo Borgonia sa Department of Education (DepEd) 7 mibutyag sa Banat News kagahapon nga wala pa siya’y nadawat nga report bahin sa maong hitabo.

Matud ni Borgonia nga ipasusi niya sa division ang maong insidente ug mangayo siya og tukmang kasayoran bahin niini aron aduna siya’y basehan sa himuon niyang imbestigasyon.

Hinuon matud niya nga ikonsulta una niya sa ilang abogado ang mga himuon nilang lakang labot sa maong insidente. (BANAT NEWS)