Mananggiti gibanhigan angol sa kontra

CEBU, Philippines - Kritikal ang kahimtang sa usa ka mananggiti human kini banhigi sa silingan ug kontra niyang mananggiti sa mingaw nga dapit sa barangay San Isidro sa lungsod sa San Fernando sa miaging gabii.

Ang biktima kansang lawas naputos sa mga samad tinigbasan sa sanggot mao si Pablo Pacquiao, hingkod, ulitawo, apan dunay kapuyo, usa ka mananggiti nga nagpuyo sa maong lugar.

Samtang ang suspek mao ra usab ang laing mananggiti nga iyang kompetinsiya nga si Vicente Ybarita, 62, minyo, nga iyang silingan.

Si PO1 Lauro Laurel sa San Fernando Police Station mibutyag sa Banat News nga ang biktima ug ang suspek daan nang nagkasungi bahin sa yuta nga ilang gitikad diin nahimutang ang ilang mga sanggotan.

Nasayran sa kapolisan nga ang suspek sa wala pa ang hitabo giingong gibaharan nang daan sa biktima nga pabantay-bantayon kay iyaha kining birahan kun makalugar.

Tungod sa maong bahad gibutyag sa suspek nga nagbantay siya pag-ayo nga dili siya hiunhan niini ug niadtong Huwebes sa gabii giatangan niya ang biktima sa dalan nga agianan niini paingon sa ilang balay ug didto giligid niya kini og tigbas pinaagi sa iyang sanggot.

Gumikan sa pagpunay og panagang naputos sa samad tinigbasan ang duha ka kamot ug bukton ug ang lawas sa biktima.

Dali kining gihatod ngadto sa South General Hospital sa siyudad sa Naga ubos sa talandugong kahimtang.

Nasayran usab sa kapolisan gikan sa suspek nga nagselos kuno ang biktima tungod kay siya (suspek) mao nay gitugyanan sa tag-iya sa kalubihang ilang gipananggotan.

Nagtingkagol karon sa prisohan ang suspek samtang gisang-at na ang kaso batok kaniya. (Darrel A. Carumba/WC)