P4M nga mini nga sapatos gisakmit

CEBU, Philippines - Dul-an P4 milyones nga balor sa mga pekeng sapatos ug tsinelas ang nasakmit sa National Bureau of Investigation (NBI)-7 sa gipahigayong operasyon kagahapong adlawa sa nagkadaiyang establisamento sa Sugbo.

Matud pa ni Atty. Bernard dela Cruz, sa NBI kinsa maoy nangulo sa maong operasyon nga adunay reklamante nga nagbase sa Manila batok sa maong mga tindahan nga namaligya og mini nga DC Shoes Australia.

Ang maong reklamante giingong mao ray awtorisadong dealer sa maong brand sa sapatos dinhi sa nasud apan nahibulong sila nganong adunay mga baligyang susama niini sa maong mga establisamento.

Tungod niini, ang NBI mi-apply dayon og search warrant sa buhatan ni RTC Branch 11 Ramon Daomilas batok sa usa ka negosyanteng Chinese (pangalan gipugngan sa NBI) ning dakbayan.

Mipasabot si dela Cruz nga ang mga fake nga DC shoes, Speedo Bag Quick Silver ug Roxy Slippers maoy gireklamo sa authorized dealer.

Tuod man nakuha sa NBI ang 800 ka DC Shoes nga gibana-bana nga nagkantidad og P4 mil kada usa niini ug mobalor sa P3.2 milyones samtang ang Roxy Slippers nagkantidad usab og P300 mil.

Midugang si dela Cruz nga nagpadayon pa karun ang ilang inventory sa ilang mga nakuhang mga mini nga produkto.

Nagdumili na usab kini paghatag og dugang impormasyon kalabot sa maong operasyon sanglit aduna pa silay gihimong imbestigasyon kalabot niini.

Samtang nagpadayon pa ang ilang follow up operation hangtod ning pagpatik sa balita. (EIM) (BANAT NEWS)