Kadamay-Sugbu nagpasalamat ni Palma

CEBU, Philippines - Mapasalamaton kang Cebu Archbishop Jose Palma ang mga kabus tungod sa pagbisita ug pagpaminaw sa ilang mga problema niadtong miaging Agosto 7 didto sa Pasil Sports Complex ning dakbayan.

Gitambungan sa urban poor gikan sa syudad sa Sugbu, Mandaue ug Lapu-lapu ang maong tigom.

Ang Panaghugpong-Kadamay Cebu, grupo sa mga kabus nga lumulupyo gikan sa nagkadaiyang syudad sa Sugbu, nagkanayon nga usa ka makasaysayanon ang gibuhat sa Arsobispo nga migahin og panahon aron maminaw sa ilang yangungo.

Hinuon ang maong grupo nagtuo nga ang pakig-atubang kanila sa Arsobispo nagdasig kanila nga ipadayon ang pakigbisog alang sa tinguha nilang kabag-ohan aron mahatagan sila sa pagtagad sa kagamhanan.

“Ang nahitabo maoy nagtimaan sa kanamong katawhang kabus nga nagdasig kanamo sa padayong pagbugtaw pagbag-o sa katilingban aron inang-ang-ang mapanday ang paghulip gikan sa karaan, dunot, korap nga katilingban nagtunhay hangtud karon,” matud pa nila.

Ang maong grupo sa mga urban poor namahayag nga padayon gihapon sila sa ilang pagpadangat sa ilang mensahe sa gobiyerno aron mahatagan sila sa ilang gipangayo nga panginabuhian, disenteng kapuy-an ug hustong serbisyo. (BANAT NEWS)