CEBU, Philippines - Misaka og maayo ang kaso sa diarrhea kon kalibanga dinhi sa dakbayan sa Sugbo karung tuiga ug aduna nay 11 ang namatay sumala pa sa rekord sa City Epidemiology Surveillance Unit (CESSU) sa Cebu City Health Department.
Kini naggikan niadtong bulan sa Enero hangtud karung bulana ug miabot na sa 2,468 ang kaso sa diarrhea dinhi sa dakbayan gawas sa namatay.
Matud ni Dr. Durenda Macasucol, sa City Health Department sa Banat News nga sagad sa hinungdan mao ang tinubdan sa tubig ma-inom ingon man sa mga pagkaon nanggikan ang kagaw nga nakamugna sa sakit nga diarrhea.
Adunay gihimong mga inspeksyon ang City Health sa mga tinubdan sa tubig sa kabarangayan ning dakbayan ilabina niadtong dunay daghang kaso sa diarrhea.
Apil sa susihon sa mga health personnel ang mga karenderiya apil na kadtong mga gagmay’ng kan-anan dinhi sa siyudad pagtino kun limpyo ug luwas kan-on ang mga baligya niini sa publiko. Gikabalak-an nga mosaka pa ang kaso sa diarrhea karung ting-ulan.
Nagtuo si Macasucol nga mas taas pa ang nasakit niini sanglit ang naa sa ilang rekord mao ra kadtong nagpa-admit sa Cebu City Medical Center ug mga pribadong tambalanan.
Adunay mga gikalibanga nga nagpaalim lang sa ilang mga balay gamit ang over the counter nga mga medisina.
Ang onse ka mga pasyente nga namatay, walo niini uwahi nang nadala sa tambalanan ug nakagrabe na.
Ang mga tinugyanan sa panglawas kanunay nga mipahimangno sa publiko sa pagpabukal sa ilang mga tubig ilabi na ang ilimnon samtang kinahanglang limpyo usab ang mga pagkaon nga saluhan paglikay sa sakit. (EIM) (BANAT NEWS)