Doktor gitulis duol sa ilang balay

CEBU, Philippines - Usa ka doktor sa Cebu City Medical Center ang nabiktima sa mga armadong tulisang nagmotorsiklo sa miaging gabii sa Tabok Lamac sa lungsod sa Liloan.

Si SPO2 Ernesto Pepito sa kapolisan sa maong lungsod miila sa biktima nga mao si Dr. Lee James Maratas, 33, nagpuyo sa barangay Yati, sa maong lungsod.

Matud pa niya nga naglakaw si Maratas pauli sa ilang panimalay gikan nga nanaug sa jeepney dihang kalit kining gibabagan sa duha ka tawong nagmotor.

Ang lalaking angkas mition og armas kang Maratas ug mideklarar og tulis ug gipangayo ang shoulder bag niini nga gisudlan sa duha ka cellphone, salapi nga P1500, mga ID ug uban pa.

Ang dapit nahitabo pipila lang ka metros gikan sa balay sa biktima, ang kapolisan mihimo na og imbestigasyon sa maong insidente.  - BANAT NEWS