Pag-ban sa close-type helmet gitun-an

CEBU, Philippines - Gipatun-an ni Mayor Michael Rama ngadto sa legal section sa Cebu City Traffic Operations Management (Citom) ang plano nga pag-ban sa mga helmet nga nagtabon sa nawong ug kadtong mga mag-bonnet samtang nagmaneho og motorsiklo.

Sumala pa sa mayor nga usa kini sa nakita niyang butang aron dali ra mailhan kadtong mga tawo nga mobuhat og dautan sama sa mga kawatan nga magsakay og motor.

Nagkanayon ang mayor nga kanunay nalang siya makadungog og mga balita nga kasagaran sa mga kawatan ang mogamit og motorsiklo unya nagtabon sa ilang nawong hinungdan nga dali ra kaayo kini makaipsot ug dili dayon mailhan sa mga biktima.

Dugang pa niya nga kung makit-an ang nawong sa nagmotorsiklo dali rang madakpan sa kapulisan ang mga kawatan ilabi na kung ang usa ka establisamento dunay CCTV Camera.

Samtang nakatabang usab pag-ayo sa pagsugpo sa mga dautang tawo ang kanunay nga paghimo og checkpoint sa mga motorista ilabi na sa mga ngiob nga lugar.

Una na nga mipahimagno ang kapulisan sa katawhan nga maglikay kanunay sa pag-agi og mingaw nga mga lugar ug dili maglakaw nga mag-inusara ilabi na panahon sa kagabhion aron dili mapunting sa mga dautang elemento.  - BANAT NEWS