Mga lungsod nakadawat og ganti

CEBU, Philippines - Nakadawat og tag P200 mil    matag   usa sa top ten local government unit tungod sa subsob nilang suporta sa gi-implementar nga EGWEN Our Cebu Program nga gipasiugdahan ni Governor Gwendolyn Garcia.

 Ang nakadawat sa nahisgutang kantidad gikan sa kagamhanan sa lalawigan sa Sugbo mao ang lungsod sa Argao, Barili, Boljoon, Cordova, Dalaguete, Poro, San Francisco, Tabuelan, Toledo ug Tudela.

Sila si Gobernador Garcia ug ang president sa Ramon Aboitiz Foundation Inc. Roberto Aboitiz maoy nangunay sa pagdunol sa maong award ngadto sa mga opisyales sa nahisgutang mga lungsod.

Samtang laing tulo ka mga lungsod usab ug dakbayan ang nakadawat og tag P100 mil   isip modelo sa maayo nga pangagamhanan alang ning tuiga.

Ang nakadawat sa maong benepisyo mao ang lungsod sa Asturias, Consolacion, Lilo-an ug dakbayan sa Carcar.

Sa samang higayon gihatagan usab og award sa probinsya sa Sugbo ang napulo ka mga barangay nga maoy ihemplo alang sa mga kabarangayan sa pag- implementar sa maong programa.

Sama sa pipila ka mga lungsod, ang mga opisyal sa nahisgutang mga barangay nakadawat og usab tag P100 mil matag usa.

Lakip sa gipasidunggan mao ang 13 ka mga ahensya sa Rehiyon 7 nga naglakip sa DENR Environmental Management Bureau, DENR Penro, DENR Penro Capitol, DILG, DOT-7, DepEd-7, Provincial Agricultural Office, Provincial Veterinarian Office, IPHO, PPDO, PSWDO, Committee on Heritage Site and Relics,   ug ingon man ang DPWH-7, subay sa ilang subsob nga pagsuporta sa maong programa.

Nunot sa maong kalampusan si Aboitiz nagkanayon nga magpadayon gayud ang ilang suporta sa mga programa ni Gobernador Garcia.  - BANAT NEWS