Palma misuporta ni Gwen

CEBU, Philippines - Gibutyag ni Cebu Archbishop Jose Palma ang iyang 100 porsyentong suporta sa Cultural Heritage Program ni Gobernador Gwendolyn Garcia kay nagpareserbar kini sa mga karaan nga mga kabtangan ilabina sa mga karaan na kaayong mga simbahan.

Giangkon ni Palma nga sa iyang pagpakighinabi sa gobernador, mihangyo kini nga motabang sa pagpreserbar sa mga karaan na nga simbahan sama sa suporta nga gihatag ni Cebu Archbishop Emeritus Ricardo Cardinal Vidal.

Niadtong Biyernes sa iyang wali sa Santos nga Misa didto sa Cebu International Convention Center (CICC) atol sa pagbukas sa 2011 One Cebu Expo, si Palma subling mipadayag sa iyang kinatibuk-ang suporta sa kawsa sa gobernadora sa pagpreserbar sa karaang mga butang nga maoy magsilbing handumanan sa katigulangan.

Matud pa ni Palma nga iyang giaghat ang heritage council sa Artsidiyosesis sa Sugbo sa paghimo og lakang aron mapreserbar ang mga karaan nga mga simbahan ug uban pang mga rehilihoyosong mga butang sa simbahan.

Gawas sa heritage council sa simbahan, si Palma personal usab nga mihangyo ngadto sa mga kaparian atol sa ilang mga tigum nga tipigan ug ampingan ang mga kabilin sa karaang simbahan. (Chester Abadilla/WC) (BANAT)