Publiko gipahimangnoan vs dengue

CEBU, Philippines - Gipahimangnoan sa tinugyanan sa panglawas sa siyudad ang publiko sa pag-amping nunot niining pagsige og ulan nga nagdala og mga sakit ilabi na sa makamatay nga sakit nga dengue.

Gawas sa dengue nagkadaiyang sakit usab ang mitumaw sama sa ubo, sip-on ug uban pa ang angayan bantayan matud pa ni City Assistant City Epidemiologist Durenda Macasucol.

Nasayran nga moabot na ngadto sa 692 ka kaso sa dengue gikan sa bulan sa Enero hangtud sa tunga-tungang bahin sa tuig 2011 ug walo na ang namatay.

Kumparar sa susamang mga bulan sa miaging tuig mas daghan ang natala nga kaso sa dengue nga miabot ngadto sa 722 ug pito ang namatay.

Sumala pa ni Macasucol ang paglimpiyo sa palibot maoy labing epektibo nga pamaagi sa paglikay sa dengue ug ubang sakit.

Dugang pa niya nga kinahanglang modangop dayon sa labing duol nga health center sa ilang tagsatagsa ka lugar kung adunay gipamati sa lawas sama sa walay hunong nga hilanat aron masuta dayon kung nataptan ba kini sa dengue o wala.

“Kung limpiyo lang gyud ang palibot, ang usa ka tawo luwas gyud sa dengue. Kanang mga butang nga kasagaran mapundo ang tubig, angayan gyud na iyabo aron dili puy-an sa mga lamok,” nagkanayon si Macasucol.

Malipayon usab si Macasucol gumikan kay duna pu’y mga pribadong kompanya ang mihimo og nagkadaiyang anti-dengue caravan dinhi sa Sugbo. (Sanden J. Anadia/EIM) (BANAT)