Duna pay wa kabalik sa mga nasunogan

CEBU, Philippines - Sulod sa duha ka buwan na ang milabay, nagkadaiyang sunog ang miigo sa siyudad sa Sugbu apan hangtud karon aduna pa gihapoy mga biktima nga wala pa makabalik sa normal nilang pagpuyo.

Kini bisan paman aduna na kanila ang nakadawat sa mga housing materials gikan sa kagamhanan sa siyudad samtang ang uban padayong nagpaabot alang sa ipatumang re-blocking sa ilang mga dapit.

Kini aron pagsigurong sa sunod nga adunay alarma sa sunog daling makasulod-gawas ang kabomberuhan sa kabalayan tungod kay kaniadto nagsikit-sikit lang ang mga balay maong walay mahimo ang mga bombero nga madala pagpawong ang kalayo.

Diha sa barangay Tejero 96 ka pamilya ang gitugutan nang makatukod pagbalik sa ilang balay human na nila hingpit nga nadawat ang mga housing materials niadtong Lunes sa gabii. Ang Tejero maoy usa sa gikinahanglang i-reblocking ug adunay pila ka pamilya ang naigo niini nga nagpaabot pa sa luna nga ilang kabutangan.

Samtang sa Punta Princesa, padayon gihapon nga nag-istar sa sports complex ang kapin sa 300 ka kamilya nga mga biktima sa sunog duha ka semana na ang nakalabay.

Kini gumikan kay nagpadayon pa ang negosasyon ang siyudad alang sa re-blocking sa maong dapit, ang executive director sa Cebu City Disaster Risk Reduction Management Council (NDRRMC) nga si Alvin Santillana ug kaubanan sa mga komitiba ug buhatan sa city hall gikatakdang magtigom karong adlawa kabahin niini.

Samtang ang lima ka pamilya sa Mambaling padayong nagpuyo sa tent sanglit giingong ang ilang housing materials idungan sa paghatag sa higayon mahatagan na ang mga biktima sa Punta Princesa.

“Ang housing materials sa Mambaling gisakay na nato sa Punta Princesa busa dungan ra sila nga makadawat,” sumala pa ni Santillan.

Samtang ang mga biktima sa sunog sa Sambag ug Guadalupe nga maoy labing uwahing nabiktima sa sunog una pang nakadawat sa mga housing materials.

Sumala pa ni Santillan nga anam-anam ang pagbuhat nila og solusyon sa maong problema gumikan kay nagsunod-sunod ang mga nahitabong trahedya sulod sa duha ka buwang milabay. (EIM) (BANAT)