Trial by publicity ang nagpasulabi sa Pique case -TF Pique

CEBU, Philippines - Nagtuo ang Task Force Ellah Joy Pique nga wala nay laing mabuhat ang kampo ni Bella Ruby Santos ug uyab niining Briton nga si Ian Charles Griffiths nga libogon ang katawhan pinaagi sa pagtuis sa tinuod nga nahitabo niadtong Pebrero sa pagdagit ug pagpatay sa 6-anyos nga si Pique diha sa barangay Calajoan sa lungsod sa Minglanilla.

Apan si Sr. Supt. Patrocinio Comendador, tigpamaba sa Task Force Pique nagkanayon nga bisan og unsa pay buhaton sa kampo ni Santos dili gyud matuis ang kamatuoran nga lig-on ang ilang kasong gipasaka batok sa duha.

Sa sayo pa si Comendador mipadayag nga ang resulta sa DNA test dili makaapekto sa ilang kasong gipasaka batok nilang Santos ug Griffiths kini mapositibo man o manegatibo ang resulta niini.

“Karon pa sad ko ka sugat aning kaso nga sige lang og trial by publicity,” matud pang Comendador.

Siya mitataw nga prayoridad sa task force karun mao nga madakpan si Santos ug madala sa Pilipinas si Griffiths aron tubagon ang kaso niini sa korte kay alang kang Comendador anaa sa korte ang husto ug tukma nga lugar nga kombatihan sa duha ka habig.

Matud niya nga duna siya’y pagduda nga ang kampo ni Santos ug Griffiths nahibawo kung asa karun ang ilang gipangita nga nagtago-tago apan girespeto sa task force ang lawyer-client nga relasyon.

Hinuon ila kining tan-awon kung asa kutob ang limitasyon sa mga abogado nga dili sila makalapas niini. (Rey B. Pasaporte/EIM) (BANAT)