Awtoridad abtik na vs human trafficking

CEBU, Philippines - Abtik na karon ang mga awtoridad sa pantalan pagtubag sa mga alarma ilabi na may labot sa human trafficking nga diin hasta ang wala maayong komunikasyon sa nagbiyaheng mga batan-on ngadto sa ilang mga ginikanan giseryuso ug aksyon sa mga sakop sa Cebu Ports Authority.

Kini nahitabo niadtong milabay’ng gabii dihang gipakanaog sa mga awtoridad ang lima ka mga pasahero diin duha niini pulos mga bata nga gikan pa sa Camotes Island.

 Matud pa ni Insp. Archie Guinitaran sa Cebu Ports Authority Port Police nga usa ka ginikanan ang midangop ngadto kanila ug nagpatabang kalabot sa iyang anak ug upat pa ka paryente nga gidala ngadto sa Ormoc City .

Ang ginikanan matud pa ni Guinitaran mibutyag nga dunay tawong (pangalan gipugngan sa Banat News) midala sa iyang anak ug mga paryente ngadto sa dakbayan sa Ormoc aron patrabahuon sa dakbayan sa Cagayan de Oro.

Mga alas 6:18 sa milabay’ng gabii miabot sa Sugbo ang barko sa Cebu Ferries gikan sa Ormoc nga gikatakdang molahos og biyahe ngadto sa Cagayan de Oro.

Nunot niini daling giadto sa mga polis ang maong barko ug gitagsa-tagsa og tan-aw ang mga pasahero ug dihang ilang nakit-an ang mga bata uban sa tulo ka hamtong gipakanaog sila gikan sa barko.

Sa pasiunang imbestigasyon nasuta nga taga barangay Consuelo Lungsod sa San Francisco Isla sa Camotes ang mga gi-recruit nga nagpangidaron babayeng 19-anyos, duha ka lalaking nag-edad og 21 ug 18-anyos, ug ang 14 ug 16-anyos nga mga minor de edad.

Ang lima gihatud ngadto sa Department of Social Welfare and Development apan didto nasuta nga giingong dili pa makunsiderar nga “human trafficking” ang nahitabo.

Kini tungod kay ila rang mga kabanay didto sa Cagayan de Oro ang mikuha kanila aron sila patrabahuon. Nabalaka ra diay ang lima tungod kay gidala sa dakbayan sa Ormoc aron diay didto manukad ug dili sa Sugbu pag-adto sa Cagayan de Oro.

Misamot ang kabalaka sa ginikanan sa mga biktima gumikan kay dili na makontak ang cell phone sa nagdala kanila hinungdan sa pagtaho niini ngadto sa port police.

Human masuta sa DSWD nga walay human trafficking nga nahitabo uban sa pagpasabot sa abogado sa nagdala sa mga bata nga si Atty. Briccio Boholst ang mga biktima gibuhian mga alas 10:05 sa milabay’ng gabii. (Bong Soriano/EIM) (BANAT)