Comendador nagpaabot sa sumbong sa konsehal

CEBU, Philippines - Gibutyag kagahapon ni Sr. Supt. Patrocinio Comendador, hepe sa kapolisan sa probinsya nga wala pa siya makadawat og pormal nga reklamo gikan ni konsehal Rosalio ‘Otam’ Cerenio sa barangay Bato, dakbayan sa Toledo nga mipasangil kang Insp. Rogelio Amoroso nga gibaharan siya niini atol sa ilang lalis niadtong Sabado.

Matud ni Comendador nga text message ra ang iyang nadawat sa maong hitabo ug hangtud kagahapon wala pa siya’y nadawat nga pormal nga reklamo sa konsehal.

Apan bisan pa niini, iya gihapong paimbestigahan si Amoroso ug ang kauban niining si PO2 Edwin Carbonquillo.

Alang kang Comendador nga angay barogan sa konsehal ang iyang pasangil batok kang Amoroso aron kahatagn og tukmang aksyon ang maong polis kun tinuod ang maong pasangil.

Nagtuo si Comendador nga adunay kasuko ang konsehal gumikan sa   subsob nga operasyon sa kapolisan sa pagpanakop sa mga nagpadagan sa ilegal nga sugal nga masiao sa Toledo.

Nasayran ni Comendador nga may masiao financier sa Toledo nga nasuko   sa mga polis.

Giklaro ni Comendador nga kun nakasala ang iyang sakop dili siya molaban niini ug iya kining disiplinahon apan kun ang motibo sa mga namasangil tuyo lang niining dauton ang reputasyon sa mga polis pinaagi sa pagdangop sa media, iya usab kining depensahan.

Wala hinuon moklaro si Comendador kun ang grupo ni Amoroso aduna bay naligsan nga financier sa masiao sa Toledo.

Matud ni Comendador mas maayong mo-execute og affidavit si Cerenio labot sa iyang pasangil aron lig-on kaayo ang ilang basehanan sa pag-imbestigar kang Amoroso.

Sa nasayran nagpa -blotter si Cerenio sa barangay hall sa Bato, Toledo ug pagkahuman nagpa-blotter usab kini sa police station sa maong dakbayan niadtong Sabado.

Gibutyag sa konsehal nga nasuko si Amoroso kaniya sa dihang wala niya tugoti nga unahon og buhi sa roydahan ang manok   sa maong polis tungod kay may nakauna man sa iyang manok niadtong higayona.

Matud sa kagawad nga sa dihang buot na siyang mouli ug misakay siya sa iyang sakyanan nga didto pa sa parkingan ug giduol kuno siya ni Amoroso ug Carbonquillo ug miingon iya siyang (Amoroso) gipakauwawan.

Iya unta kining gipasabot apan nasuko kuno hinuon ang maong opisyal ug mibahad nga nagkanayon ‘pagbantay kay birahan tika’ dayun gitulisok siya ug miaksyon pagkupot sa armas de fuego nga gitangkil sa maong polis.

Matud ni Comendador nga iyang imbistigahon si Amoroso. (BANATNEWS)