Kuratong sa Sugbu nabungkag

CEBU, Philippines - Gibutyag ni Sr. Supt. Patrocinio Comendador, director sa Cebu Provincial Police Office (CPPO) nga orihinal nga miyembro sa Kuratong Baleleng Gang ang nadakpan sa Provincial Intelligence Branch (PIB) niadtong Domingo sa kaadlawon nga si Leonardo Tabasan.

Si Tabasan nadakpan sa giabangang balay diha sa barangay Sudlonon sa dakbayan sa Bogo niadtong Domingo sa kaadlawon. Siya kanhi sakop sa Philippine Navy sukad 1980 apan na-dismiss sa serbisyu tungod sa kasong Absent Without Official Leave (AWOL) niadtong 1990.

Si Comendador mibutyag nga nalambigit sa ‘criminal activity’ si Tabasan dinhi sa probinsya sa Sugbu lakip na didto sa Metro Manila sama sa mga dagkong pagpanulis og banko.

Gani nalambigit si Tabasan sa Banco de Oro Pampanga Branch pipila na ka tuig ang nakalabay apan giingong na-dismiss ang maong kaso ug mao na kini ang ikatulong higayon nga kini nadakpan.

Si Tabasan nakuhaan og drugas, kalibre .45 nga armas, granada. Unang nadakpan sa PIB ang manag-agaw’ng Hermosilla nga sila si Nelson ug Harold ug Eldie Flores sa dakbayan sa Lapulapu ug nakuhaan duha ka kalibre .45 usa ka .38 revolver, usa ka granada, upat ka paketeng gidudahang may sulod nga shabu ug drug paraphernalia. Ang operasyon batok ni Tabasan konektado sa pagkasikop sa gipasanginlang drug pusher nga si Arman Tipon-tipon sa barangay Dakit sa Bogo.

Matud ni Comendador ang grupo nalambigit sa tulis sa dakbayan sa Lapulapu sa usa ka lending firm sa miaging semana sa barangay Pajac diin nadala ang P28 mil.

Sumala pang Comendador gi-recruit ni Tabasan ang manag-agaw’ng Hermosilla ug Flores aron dad-on sa kaulohan aron didto sila mohimo’g pagpanulis.

Gipangangkon ni Comendador nga hingpit na nilang na-neutralized ang maong grupo tungod sa pagkasikop ni Tabasan ug mga sakop niini. Nakakuha usab sila og impormasyon duha ka semana na ang nakalabay nga target unta sa grupo ang Globelines ug Petron Mandaue Branch.

“Ang importante ani na-neutralized nato ang big time group from Mindanao, atong napugngan ang mga dagko nilang plano sa pagpanulis kay nakuha nato ang ilang lider,” matud pang Comendador. Gisubay usab kung may koneksyon ang mga armas sa grupo sa pag-ambush sa negusyanteng si Antonio Ouano sa miaging buwan diha sa dakbayan sa Mandaue.

Sa pamahayag ni Tabasan niadtong milabay’ng Domingo kini mihimakak nga aduna kini gihuptang grupo. (BANATNEWS)