Mamaligyaay'g kuskos gipanakop

CEBU, Philippines - Nasikop sa kapolisan ang lima ka mga tawo sa managlahing dapit nga gitumbok nga maoy namaligya og cyanide o kuskos ngadto sa mga ilegal nga mga mananagat sa barangay Kalawisan ug sa barangay Poblacion dakbayan sa Lapulapu.

Unang nadakpan sa milabay’ng Sabado si Ricardo Cañete, 52, nagpuyo sa sitio Langub, Poblacion dakbayan sa Lapulapu human rondaha sa mga sakop sa Task Force Kalikasan sa pagpangulo ni PO3 Jomar Ybañez uban sa Fish Warden sa dakbayan nga si Andy Berame.

Matod pa ni Ybañez nakadawat sila og report nga si Cañete maoy tigbaligya sa maong kemikal nga gamiton sa pagpanghilo sa isda sa mga mananagat nga gusto’g mas sayon nga pamaagi pagkuha sa isda.

Nakuha gikan ni Cañete ang 1.4 kilos nga cyanide ug balor P150 nga halin sa pagpamaligya niini.

Pagkasunod adlaw’ng Domingo gironda sa kapolisan barangay Kalawisan nga miresulta sa pagkasikop sa upat ka tawo nga ang duha niini giingong mamaligyaay og cynide.

Ang namaligya mao sila si Moises Agnes, 53, ug Ben Bensi, nga kahibulongang pareho og apelyedo sa barangay kapitan sa maong barangay.

Ang duha pulos mga residente sa Zone Kasag sa maong barangay, ug giapil sa pagdakop ang duha ka mga mananagat nga sila si Jimmy Ramirez, 27, ug Generoso Tamparong, 35, mga residente sa barangay Ibabao sa lungsod sa Cordova nga giingong naaktuhang namalit sa maong kemikal.

Si Agnes nakuhaan og 30 ka paketeng kuskos ug P150 nga gituhoang halin sa pagpamaligya niini og kuskos, samtang si Bensi nakuhaan og tulo ka pakete sa kuskos nga iyang gibaligya ngadto ni Ramirez ug Tamparong.

Kasong kalapasan sa RA 8550 gumikan sa pagpamaligya ug mga makahilong kemikal sa isda ang gipasakang kaso sa mga sakop sa TFK batok sa mga suspetsado kagahapon. (BANATNEWS)