CEBU, Philippines - Mikabat sa 300 ka mga exhibitor ang namaligya karon sa nagkalainlain nilang produkto sa Once Cebu Expo, nga usa sa mga dagkong kalihokan niining pagsaulog sa Kapitolyo sa ika-442 nga anibersaryo sa lalawigan sa Sugbo.
Matag lungsod nga misalmot gipabansiwag ang mga lokal nga produkto nga maoy naghatag og panginabuhi sa ilang tagsatagsa ka lungsod.
Kini aron maila sa mga bisita ang mga lungsod pinaagi sa produkto nga makita niini sulod sa Cebu International Convention Center (CICC) sa dakbayan sa Mandaue.
Pipila sa mga mitambong atol sa pagbukas sa One Cebu Expo sa miaging adlaw mao sila si Senador Frankilin Drilon, kanhi Tanzanian President Benjamin William Mkapa, ug kanhi senador Leticia Ramos Shahani gawas sa mga lokal nga opisyal sa kagamhanan sa lalawigan.
Matud pa ni Drilon nga sukad sa ilang pagsuroy sa mga kaprobinsiyahan, karon pa siya makasugat sa kaatibo sa partisipasyon sa nagkadaiyang sector ilabina sa business sector aron molampos ang One Cebu Expo.
Gihulagway ni Drilon ang maong kalihukan nga nagmatuod nga nagkahiusa gyud ang mga Sugbuanon sa usa ka dakong selebrasyon.
Samtang si kanhi Tanzanian President Mkapa nakadayeg sa gipahigayong One Cebu Expo nga gipangulohan ni Gobernador Gwendolyn Garcia.
Siya miingon nga may napilian na silang mga produkto nga mahimo nilang ipang-import ngadto sa ilang nasud tungod kay ang mga materyales sa produkto nga gigama dinhi sa Sugbo gigamit usab sa ilang nasud.
Si Gobernador Garcia mibati usab og kalipay sa mga pagdayeg nga gihimo sa mga dumuduong nga nakasaksi sa pagbukas sa One Cebu Expo ug nagtuo siya nga makatabang usab kini sa pag-promote aron mainila ang mga lokal nga produktong gipamaligya sa mga kalungsoran sulod sa CICC karon. (BANATNEWS)