Ulitawo gipusil angol sa tulisan

CEBU, Philippines - Samdan ang usa ka ulitawo nga nag-atang   human kini pusila sa wala hiilhing manglabnihay didto sa sitio   Cabayabsan, barangay Cambanay, dakbayan sa Danao sa miaging kaadlawon.

Ang biktima mao si Joel Enrique Albano,   28, ulitawo nga taga dalan Pio del Pilar, sa barangay Poblacion sa maong dakbayan.

Matud pa ni SPO4 Gomez sa Danao Police Station nga ang biktima gikan pang namista sa iyang higala sa sitio Cambanay   dihang samtang nag-atang siya og sakyanan pauli sa ilang balay sa barangay Poblacion sa maong dakbayan, naagian siya sa nag-inusarang snatcher.

Matud pa ni SPO4 Gomez nga kalit nga gilabni niini ang shoulder bag   sa biktima nga may sulod nga salapi ug cellphone nga ang takan nagkantidad og P5,000.

Gumikan sa kakurat, wala ihatag sa biktima ang iyang shoulder bag hinungdan nga   samtang nagbinonlutay sila niini milanit ang snatcher sa iyang armas de fuego ug gipusil niini ang paa sa biktima.

Nakuha gayud sa kawatan ang maong   bag     dihang nahagba sa yuta ang biktima.

Ang mga lumolupyo sa maong dapit mao nay mihatod sa biktima ngadto sa Danao City District Hospital apan  gibalhin kini ngadto sa Vicente Sotto Memorial Medical Center sa dakbayan sa Sugbo.

 Padayon pang gipangita sa kapolisan ang maong snatcher.   - BANAT NEWS