Wa ilhing batan-on gipusil patay

CEBU, Philippines - Namatay diha-diha ang usa ka wala hiilhing bayong-bayong human kini pusila   sa wala usab hiilhing mamumuno didto sa dalan Acasia, barangay Kamputhaw ning dakbayan   sa Sugbo kagahapon sa alas 3:00 sa hapon.

Ang biktima nagsul-ob  og light yellow green nga sleeveless t-shirt, nag-short og puti   ug may tsinelas nga puti usab.

Si PO3 Ruth Violango sa homicide section sa Cebu City Police Office mibutyag sa Banat News nga ang biktima nagbaklay lang sa maong lugar dihang kalit lang mihunong sa kilid niini ang usa ka motorsiklo nga gisakyan sa duha ka wala hiilhing lalaki.

Dayon ang angkas niini maoy mipusil sa biktima ug gumikan kay nasabak kini sa liog ug sa walang bahin sa iyang ulo, nahagba kini sa yuta ug namatay.

Ang kapolisan nga mitubag sa alarma nakapunit og duha ka kabhang sa bala sa kalibre.380 nga maoy gigamit sa pagpusil sa biktima.

Matud pa ni Violango nga wala pa nila masuta ang motibo sa maong pagpamusil ug padayon pa nilang gipanguita karon ang mga criminal.  - BANAT NEWS