Sikyu gipusil patay sa nagmotor

CEBU, Philippines - Usa ka security guard gipusil patay sa usa ka wala hiilhing kriminal nga nagsakay og motorsiklo didto sa dalan F. Ramos ning dakbayan sa Sugbo sa miaging gabii.

Ang biktima mao si Ritche Mancera, 38, lumad nga taga lungsod sa Dumanjug ug usa ka gwardiya nga   sakop sa Cebu Niño Security Agency ug nadestino sa Rain Tree Mall sa dalan F. Ramos.

Sa imbestigasyon nga gihimo sa kapolisan nasayran nga ang biktima on-duty niadtong higayona   nga naglingkod sa iyang puwesto

Dihang kalit  lang gihunongan sa usa ka motorsiklo nga gisakyan sa duha ka wala hiilhing mga lalaki.

Unya ang angkas niini maoy milanit sa iyang armas de fuego ug dayong pusil ngadto sa agtang sa biktima.

Daling gihatod ngadto sa Cebu City Medical Center ang biktima apan pipila ka oras ang nakalabay nabugtoan kini sa kinabuhi. Nasayran usab sa kapolisan nga sa wala pa mahitabo ang pagpamusil , ang girelibohang gwardiya sa biktima nga si Rolito Roliente gikatahong may gikalalis nga usa ka lalaki kansang motorsiklo giparking sa maong lugar.

Ang mga saksi mitug-an sa kapolisan nga nasuko ang maong lalaki kay nawagtang ang iyang helmet nga gibilin niya sa iyang motor.

Unya sa iyang kapungot mibahad kining balikon si Roliente, apan pipila ka gutlo, girelibohan usab si Roliente sa biktima. Miingon si Roliente nga nadistansya lang siya og pipila ka metros, nabati niya ang usa ka buto sa armas ug nakita niya ang biktima   nga samaron ug nagkadugo.

Gituohan sa kapolisan nga nasaypan lang ang biktima, apan padayon pa nilang   gipangita karon   ang kriminal.  - BANAT NEWS