Heneral Loot milabtik sa mga kritiko

CEBU, Philippines - Gilabtikan sa bag-ohay lang na-promote nga heneral sa kapolisan nga si Chief Supt. Vicente Loot ang iyang mga kritikong giingong nagtinguha kaniadto sa pagbabag sa iyang promosyon.

Si Loot ang bana sa kasamtangang mayor sa lungsod sa Daanbantayan nga si Mayor Ma. Luisa Loot kansang pagka-politiko maoy usa sa gidudahan sa heneral nga daghan ang buot mobabag sa iyang promosyon.

Giklaro hinuon ni Loot nga wala niya basula ang iyang asawa sa pagkalangay sa iyang promosyon nga unta kaniadto pa niya nadawat apan giangkon niyang naapektahan gyud ang iyang trabaho tungod niini.

“This is now the reality, the truth that hurts some of my wife’s ‘friends’, after all the hullabalo, ang bituing nagniningning ay sa wakas naging akin,” matud pang Loot kinsa nagpasalamat usab sa Kahitas-an nga gitubag ang iyang mga pag-ampo nga ma-promote.

“Lisud mahimong bana sa usa ka politiko ilabi na kung polis ka,” sumala pa sa heneral kinsa mihulagway nga daw imposible na karong panahona nga iyang maabot tungod sa mga sirkumstansya.

“Today, marks the culmination of my little battle against persecution, systematic disinformation, parochial and crab mentality sa ato kauban nga mga lungsoranon,” padayag pa ni Loot human ang mismong mga nangdaot kaniya naunay sa ilang gipanghimo.

Gihulagway niya nga ang iyang promosyon mitakdo sa pamahayag ni Presidente Benigno Aquino III nga “daang matuwid” nga tumong aron putlon ang “palakasan” aron molambo ang ekonomiya.

Sumala pa ni Loot nga ang promosyon sa kapolisan dili tungod kay politikong nagduso kondili tungod kay kwalipikado na ang opisyal.

Mas naila si Loot dihang nadestino pa kini sa Sugbu diin natudlo siyang Cebu Provincial Police Office director, nabalhin sa Police Regional Office-7 una pa kini mabalhin sa PRO-8 diin siya na maoy Deputy Regional Director for Administration nga ang posisyon huptan sa usa ka “one-star” general.

Si Loot naputos og mga kontrobersya sa dihang nadestino pa kini sa Sugbu ug gipasanginlan og daghang mga alegasyon ilabi na panahon sa eleksyon dihang mikandidato pa ang iyang asawa.

“For the record I was never displaced, reassigned or transferred for cause – until the ugly face of politics bore its ugly head,” matud pang Loot.

“It’s God’s will of giving me a place, of His own choice, where I could be promoted instead of persecuted,” pasabot pang Loot.  - BANAT NEWS