Taga Tanzania mibilib sa mga inmate

CEBU, Philippines - Gidayeg pag-ayo sa kanhi presidente sa Republic of Tanzania ug karon Chairman sa South Centre Board Member nga si Benjamin Welliam Mkapa og mga kaubanan ang talagsaong abilidad sa mga dancing inmate sa Cebu Provincial Detention and Rehabilitation Center (CPDRC).

Kini human nila makita ang gidalit nga sayaw sa maong mga binilanggo diin nasaksihan nila ang ka disiplinado niini   base sa gipakita sa ilang mga sinayawan.

Matud pa ni Mkapa nga dako kaayo ang determinasyon sa mga piniriso sa pag-usab sa ilang tagsatagsa ka kinabuhi ug mga binuhatan sulod sa prisohan nga madala usab nila inig gawas nila gikan sa bilanggoan.

Si Mkapa miingon nga nakadayeg kaayo siya   kang Gobernador Gwendolyn Garcia sa maayong pagdumala niini sa mga piniriso sa CPDRC nga maoy nakapahimong inila niini sa tibuok kalibotan.

Dugang pa ni Mkapa nga ilang nakita nga gihatagan gayud og bag-ong kahulogan sa gobernador ang mga kinabuhi sa mga binilanggo pinaagi usab sa pagrespeto sa pagkatawo niini bisan paman sila piniriso.

Samtang si kanhi senador Leticia Ramos Shahani sa iyang bahin mapasigarbuhon usab kaayo sa iyang nakita nga mga dancing inmate sa maayong pag-atiman sa gobernador.  - BANAT NEWS