Jinggoy gikulbaan tupad ni Palma

CEBU, Philippines - Giangkon ni Senate President Pro-Tempore Jinggoy Estrada nga gikuyawan siya dihang nagtupad sila og lingkuranan ni Cebu Archbishop Jose Palma atol sa Garbo sa Sugbo awarding niadtong Biyernes sa pamasin nga hangyuon siya niini kabahin sa kontrobersyal nga Reproductive Health Bill nga kasamtangang nag-ungot sa Kongreso.

Si Estrada maoy guest of honor atol sa Governor’s Ball apan nauwahi kini og abot diha sa Kapitolyo ug gipalingkod tupad ni Palma samtang sa pikas si Gob.Gwendolyn Garcia.

Si Palma gipasidunggan og Award of Distinction and Medal of Merit uban sa uban pang mga personahe. Kini maoy labing taas nga pasidungog nga gihatag karong ika- 442nd founding anniversary gikan ni Garcia ug Vice Governor Agnes Magpale.

Si Estrada mipasalig kang Palma nga siya mobotar sa RH Bill base sa iyang konsensya isip usa ka debotong Katoliko.

Mipasalamat usab si Estrada sa mga Sugbuanon tungod sa pagdaog niini dinhi niadtong nakalabay’ng 2010 human silang duha sa iyang inahan nga si kanhi Senador Loi Ejercito napildi sa milabay’ng piniliay.

“If Cebu City is considered as the Queen City of the South then Cebu Province just the same must be the Queen Province of the South,” matud pa sa senador.

Senate Bill ni Estrada

Si Estrada usa sa mga senador nga wala pa mopadayag sa ilang baruganan kabahin sa maong balaudnon apan kini hugtanong mosupak batok sa gipalabang karong Divorce Bill nga gihulagway usab sa simbahan nga makaguba sa kabalaanon sa usa ka pamilya ug sa kaminyuon.

Adunay balaudnon nga gipasa si Estrada nga iyang gihulagway nga maka-kompromiso sa mga tawong nagduso sa diborsiyo. Kini mao ang iyang Senate Bill No. 781 nga naglatid sa “psychological incapacity” sama sa pagkabuang ug nagka-deperensya sa pangisip nga usa sa mga basehan aron mapawalay bili ang kasal.

Sa maong balaudnon, si Estrada miapil sa mga probisyon nga naglatid sa bayolenteng asawa o bana; abuso ngadto sa kapares ug sa mga anak; pag-abandona; paglikay sa kapares nga makighilawas; pagka-tapulan nga mangita og panginabuhian; dili paghatag og pinansyal nga suporta sa ilang pamilya; moral ug emosyonal nga suporta sa ilang pares ug mga anak nga walay igong hinungdan. Lakip sa probisyon sa balaudnon ni Estrada mao ang pagka-drug addict sa pares (asawa o bana); pagka-palahubog; sugarol ug nalambigit sa mga krimen; himamaye o manglaki ang babaye; pagka-bayot o tomboy; grabeng pagka-bogo o pagka-walay buot sa ilang kapares.

Samtang si Palma sa iyang pagpasalamat sa pasidungog mitawag sa mga Sugbuanong kongresista nga mga “my friends ourpro-life congressmen.” - BANAT NEWS