CEBU, Philippines - Gitug-an ni Manlalaban Ma. Ezperanza Cristina Garcia Frasco, ang abogado sa kampo ni Gobernador Gwendolyn Garcia nga mopresentar sila og upat ka mga testigos sa sunod nga hearing sa DILG karong Agosto 31.
Matud pa ni Frasco nga preparado na sila ug mahimo gani nga dili hutdon sa pagpresentar ang upat nila ka mga testigos kun matan-aw nila nga igo na ang duha sa pagpalig-on sa ilang depensa.
Kini tungod kay dili kaayo lig-on ang mga testimonya ug ebidensiya sa kampo ni anhing Vice Governor Gregorio Sanchez, busa mahimong duha lamang ka mga testigo ang ilang ipresentar apan kun gikinahanglan gayud ihurot nalang nila ang upat ka mga testigos, matud pa ni Frasco.
Samtang giklaro usab ni manlalaban Ranny Spencer Palisoc, hearing officer sa DILG nga ang pagtakda sa Agosto 31 nga maoy sunod nga hugna sa marathon hearing sa maong kaso tungod kay gusto nilang kahatagan og lapad nga higayon ang kampo sa anhing bise gobernador nga makaduso og pormal nga ebidensya ug makatubag sa mga pangutana sa dili pa ipresentar ang dugang mga testigos sa gobernador.
Hinuon si Frasco nagkanayon usab nga ilang gikalipay ang gipakanaog nga desisyon sa Korte Suprema sa Atienza versus Villaroza case sanglit magamit kini nila sa kaso sa gobernadora diin naklaro ang kalapad sa otoridad sa gobernadora kun itandi sa otoridad sa bise gobernador kun hisgutan ang pag-alagad niini sa lalawigan. - (BANAT NEWS)