Cañete nagpakiluoy sa CHED

CEBU, Philippines - Andam nga magpakiluoy si Dr. Paulus Marie Cañete ang presidente sa Mandaue City College (MCC) sa Tipolo campus sa kadagkoan sa Professional Regulation Commission (PRC) 7 aron lang makasalmot sa eksamin sa teachers board ang iyang 20 ka tinun-an nga gradwado sa kursong “education” sa gidumala niyang tulunghaan.

Ang teachers board gitakda karong umaabot nga Septiyembre, apan miluwat ang PRC og pasidaan nga walay tugotang    gradwado sa MCC Tipolo campus nga makasalmot sa maong eksamin tungod kay ilegal ang pagpadagan sa maong eskuylahan.

Gitumbok sa mga kadagkoan   sa Commission on Higher Education (CHED)   ang MCC Tipolo   campus nga walay akreditasyon     busa illegal ang kalihokan niini.

Apan nakurat si Cañete tungod kay   karon lang nag-iningon   niini ang CHED nga nangita   og akreditasyon sa MCC sa Tipolo nga unta sa mga tuig   nga nangagi gitugotan man nilang makakuha kini og eksamin sa teachers board.

Matud pa ni Cañete nga nagpadala na siya og suwat ngadto sa PRC   nga nagpakiluoy  nga unta tugotan niining makakuha og eksamin ang iyang   20 ka mga gradwado sa eksamin karong Septiyembre.

Si PRC Legal Officer Mildred Antepuesto sa press conference nga gihimo didto sa iyang buhatan mipasabot nga nataligam-an nila ang pagpaningil   sa accreditation papers sa maong eskuylahan sa miaging tuig hinungdan nga nakalusot ang mga gradwado niini pagkuha og eksamin sa PRC.

Matud pa ni Antepuesto nga karon dili na sila moluwat og lisensya sa maong mga tinun-an nga mipasar sa teachers board sa miaging tuig hangtod nga dili makatuman ang MCC Tipolo campus sa mga requirements.

May duha ka MCC sa dakbayan sa Mandaue nga nahimutang sa barangay Tipolo samtang ang usa anaa sa Mandaue City Sports Complex  nga maoy giila sa CHED 7 nga akreditado. (WC) - (BANAT NEWS)