Kihante ni Yray gipasabot sa Ombudsman

CEBU, Philippines - Nasabtan ra sa mga kihante ang posisyon sa Ombudsman Visayas bahin sa gireklamo nilang pagdawat sa usa ka municipal assessor sa lungsod sa Balamban sa iyang terminal benefit human siya moresign sa katungdanan gumikan sa pagkalambigit niya sa gitawag nga land tax scam.

Kini sa dihang gipatin-aw ni Assistant Ombudsman Virginia Santiago nga dili kapugngang makadawat og benepisyo si Titay Yray ang municipal assessor sa Balamban tungod kay wala man siya pasakai og kaso sa lokal nga kagamhanan sa Balamban.

Ang kiha sa mga apektadong magbubuhis nanukad dihang si Yray miluwat kanila og mga resibong mini   sa ilang gibayad nga buhis   sa ilang yuta.

Ang mga kihante mireklamo nga tungod sa gihimo ni Yray ngadto kanila, dili unta  siya angayan pang hatagan sa kagamhanan sa iyang terminal benefit kay nag-ong-ong man an g iyang kaso sa Ombudsman.

.Apan si Santiago mipatin-aw nga kababagan lang ang pagpagawas ug terminal benefit ni Yray kun ang kagamhanan sa Balamban mismo maoy mopasaka og kaso batok kaniya. Apan   tungod kay wala kini buhata sa lokal nag katgamhanan sa lungsod, dili kapugngan ang katungod ni Yray sa pagdawat sa iyang mga benepisyo.

Kahinumdoman nga mitumaw ang kagubot bahin sa land tax scam human hisayri sa mga tag-iya og yuta nga ang gihuptan nilang mga official receipt   gikan sa ilang gibayad nga buhis ngadto kang Yray mini.   - (BANAT NEWS)