Lolo namatay nga naglutaw sa dagat

CEBU, Philippines - Patay nang nabangalan sa mga mananagat   ang 61 anyos nga lolo kansang ulo nagkadugo   ug nagkuob kining naglutaw sa dagat didto sa barangay Daanlungsod, lungsod sa Medillen kagahapon sa alas 5:00 sa buntag.

Ang napalgang patay mao si Fernando Pasigay, 61, nga taga sitio Max barangay Daanlungsod, Medillen.

Si PO3 Paquito Soon sa Medillen Police station mibutyag sa Banat News nga girespondihan   dayon nila   ang maong hitabo human madawat ang usa ka pahibawo sa usa sa mga molupyo sa maong dapit kalabot sa patay’ng lawas sa tawo nga naglutaw sa kadagatan sa maong lugar.

Matud pa ni PO3 Soon nga gawas sa dugo sa ulo ni Pasigay, may mga samad usab ang nawong niini.

Nasayran usab gikan sa kapolisan nga si Pasigay katapusang nakit-an sa mga molupyo sa maong lugar nianang pagka alas 11:00   pa sa gabii niadtong Biyernes nga naglakaw lakaw sa baybayon nagsusapinday nga gituohan nilang hubog. Apan kagahapon sa alas 5:00 sa buntag mao nalay ilang nakita nga wala na kini kinabuhi. 

Gidudahan   sa mga tagtungod nga nalumos si Pasigay hinungdan sa iyang hinanali nga kamatayon. Ang mga kabanay sa biktima gitakdang mopaubos sa autopsy aron pagtino kun wala bay foul play ang kamatayon niini nga kasamtangang gihaya sa usa sa mga punerarya sa maong lugar.    - (BANAT NEWS)