PDEA agent na-buy-bust

CEBU, Philippines -  Nagtingkagol karun ang usa ka giingong ahente sa Philippine Drug Enforcement Agency (PDEA) human kini nasikop sa gipahigayon nga buy-bust operation sa kapolisan sa Bohol Provincial Police Office sa miaging gabii sa barangay Poblacion 2, Tagbilaran, Bohol.

Ang nasikop mao si Steven Valles, usa ka PDEA agent ug kasamtangan nga nadestino regional office sa PDEA-7 kinsa nadakpan pipila lang ka metros gikan sa ilang buhatan diha sa K of C Drive, sa maong barangay.

Sa pakighinabi sa Banat News sa hepe sa Bohol Provincial Intelligence Branch nga si Chief Inspector Jovito Atanacio mibutyag nga kaniadto pa sila nakadawat og pipila ka impormasyon kalabot sa illegal drug activity ni Valles.

Tungod niini, mihimo dayon sila og pakisusi pinaagi sa ilang mga impormante nga misikit kang Valles aron kini panid-an ug niadtong milabay’ng semana nakompirmar nila ang impormasyon.

Atol sa operasyon ang police asset gikatahong mi-order og shabu kang Valles kinsa giingong magkuhaan og supply sa maong illegal nga drugas sa Cebu nga dad-on sa Bohol.

Ang kapolisan mipadala sa ilang asset og marked money nga P5 mil alang sa pagpalit og P80 mil nga balor sa maong shabu gikan kang Valles. Dihang natunol ni Valle ang ilegal nga drugas gisikop kini dayon sa mga polis ug giposasan.

Matud pa ni Atanacio nga si Valles nagtungha sa Bohol Institute of Technology ug kanhi nadestino sa PDEA-Bohol apan gibalhin na sa PDEA-7 Regional Office sa Sugbu.

Midugang si Atanacio nga ang ilang nasabotan nga paliton ang tulo ka bultong shabu nga gibana-bana nga nagkantidad og P90 mil kun ang basehan ang street value niini.

Gawas sa nakuhang ilegal nga drugas nakuha usab gikan kang Valles ang iyang kalibre 45 nga pistola, PDEA ID, PDEA badge, laing duha ka lending card ID nga adunay pangalang ‘Jake V. Rosales’ apan ang litrato iya ni Valles, mga dokumento niini sa iyang armas, upat ka cellphone, cash nga P160,250 sa nagkadaiyang paper bills, ATM cards ug uban pa. Butyag pa ni Atanacio nga kalapasan sa Republic Act 9165 sa Art. 2 Sec. 5 maoy atubangon nga kaso ni Valles.

Si PDEA Regional Director Adrian Alvarino dihang nakahinabi sa Banat News mibutyag nga nagpadala na siya og duha ka abogado ug imbestigador sa Bohol aron paghimo og ilang pakisusi.

Matud pa ni Alvarino nga dili nila panalipdan ang ilang mga sakop nga mapamatud-ang sad-an. (EIM) - (BANAT NEWS)